Kappræður forsetaframbjóðanda hófust á RÚV kl. 19.40 í kvöld. Umræðunum í kvöld er skipt í tvo hluta.

Í fyrri hlutanum mætast sex efstu frambjóðendurnir miðað við könnun Gallup í dag og í síðari hlutanum mætast hinir sex sem mælast með undir 5% fylgi.

Í fyrri hlutanum mættu því Arnar Þór Jónsson, Baldur Þórhallsson, Halla Hrund Logadóttir, Halla Tómasdóttir, Jón Gnarr og Katrín Jakobsdóttir.

Arnar Þór var spurður um kæru hans til siðanefndar Blaðamannafélagsins vegna skopmyndar af honum sem birt var á Vísi. 

Sjá einnig: Arnar Þór kærir myndbirtingu Vísis – „Gróf aðför að mannorði mínu“

„Finnst þér að tjáningarfrelsið eigi bara að gilda um þá sem eru sammála þér?“

„Alls ekki,“ svaraði Arnar Þór, sem sagðist gera ríkari kröfur til blaðamanna en almennings. Hann styðji tjáningarfrelsi, en styðji þó ekki að fólk tali við aðra af vanvirðingu.

„Engin stétt manna á að vera hafin yfir lög og að svara fyrir sín verk.“

„Það er allt í lagi. Ég tek gríni, ég er ekki húmorslaus,“ svarar hann aðspurður um hvort hann muni kæra höfunda Áramótaskaupsins, ef hann verður forseti og gert verður grín að honum þar.