Sara Dögg Svanhildardóttir, oddviti Viðreisnar og bæjarfulltrúi í Garðabæ, mun óska eftir því að vera leyst frá störfum í bæjarstjórn á vormánuðum. Þetta kemur fram í færslu Söru Daggar á Facebook en hún tilkynnti félögum sínum í Viðreisn Garðabæjar frá ákvörðun sinni í gærkvöldi.

„Ég hef ákveðið að láta staðar numið í pólitíkinni,“ skrifar Sara Dögg og segist vera þakklát fyrir það traust sem henni hefur verið sýnt af kjósendum og félögum sínum í Garðabæ.

„Á sama tíma er ég einstaklega þakklát fyrir þá dýrmætu reynslu sem vera mín við bæjarstjórnarborðið hefur fært mér. Viðreisn í Garðabæ verður áfram í öruggum höndum félaga minna. Mér hefur verið falið óendanlega spennandi verkefni í vinnulífinu mínu sem eru þess eðlis að ég kýs að einbeita mér alfarið að því. Að fá að taka þátt í því að leiða breytingar með það að markmiði að auka tækifæri fatlaðs fólks í samfélaginu til þátttöku m.a á vinnumarkaði er ómetanlegt. Þar er verk að vinna og ég vil nýta ástríðuna mína af öllu hjarta í þau verkefni á meðan ég fæ tækifæri til,“ skrifar Sara Dögg.