Skólinn er okkar besta jöfnunartæki en til að það virki þarf að passa upp á hópastærðir og sjá til þess að kennarar fái að vinna vinnuna sína. Hver sá sem farið hefur í gegnum grunnskóla á þennan kennara sem breytti lífi hans. Þessi kennari á skilið að stjórnvöld horfi til þess hve mikilvægt starf hann vinnur og setji menntamálin í forgang. Þorbjörg Sigríður Gunnlaugsdóttir, þingmaður Viðreisnar, er gestur Ólafs Arnarsonar í hlaðvarpi Eyjunnar.
Eyjan _Thorbjorg_5.mp4
Þorbjörg Sigríður segir hópastærðir stórt vandamál í íslenska skólakerfinu. Stórir hópar komi í veg fyrir að kennarar nái að sinna öllum nemendum eins og vera þyrfti. Þetta sé eitt af því sem stendur upp úr eftir að þingmenn Viðreisnar heimsóttu skóla og ræddu við kennara og skólastjórnendur fyrir skemmstu.
„Ég er búin að óska eftir því að eiga sérstaka umræðu á Alþingi um grunnskólann. Eftir þessar heimsóknir langar mig til að ræða þetta. Við eigum öll þennan kennara, sem breytti lífi okkar, og flest okkar eigum þau nokkur svona í grunnskólunum. Við eigum að muna þessi nöfn og við eigum að tala um þetta upphátt. Ég get talað um kennara í grunnskóla, hvað þau gerðu fyrir mig. Ég get líka farið alla leið upp í menntaskóla og sagt frá því þegar Steinunn sögukennari í MR kenndi okkur um stjórnarskrána. Það varð til þess að ég fór í lögfræði. Þegar Ragnheiður Briem, íslenskukennarinn minn í menntaskóla, sagði við mig að ég gæti skrifað. Ég varð síðan pistlahöfundur. Við eigum öll þessa sögu af kennurum sem hafa verið í lykilhlutverki í okkar lífi og við erum öll í þakkarskuld,“ segir Þorbjörg Sigríður.
Mér fannst það líka dásamlegt þegar börnin mín voru í skóla, þá rakst ég á kennara sem breytti lífi sumra minna barna, en ég á fjögur.
„Já, já, ég á þrjár stelpur og ég á núna grunnskólanema, ég á háskólanema, ég á háskólanema. Þetta er algert hjartans mál. Við eldhúsborðið heima á kvöldin, fyrir utan það að foreldrarnir séu ræða kannski stöðuna í heimilisbókhaldinu, þá ertu að horfa á þessa hluti; skólana og líf barnanna þar. Ég get sagt það sama. Ragna, kennari í Breiðagerðisskóla, hvað hún gerði fyrir dætur mínar þegar við fluttum aftur heim frá Bandaríkjunum eftir að hafa verið þar í námi. Stuðningur og aðstoð við það að fá að halda enskunni við, auka námsefni, mjög skapandi í því að hjálpa stelpunum að nýta þessa gjöf sem þær höfðu fengið í samhengi við það að kunna ensku,“ segir hún.
Þorbjörg Sigríður segist sannfærð um að allir sem gengið hafi í gegnum grunnskóla eigi þennan kennara. „Þessi kennari á það skilið að stjórnvöld horfi til mikilvægis starfsins og veðji dálítið á menntamálin. Þetta er nefnilega sagan, bara í grunnmyndinni, kennarinn fái að vera kennari, fái að halda áfram að breyta lífi barnsins til góðs, að við horfum á það að þetta er okkar besta jöfnunartæki – skólinn.“
