Bitcoin hefur hækkað mikið frá áramótum, mikið til vegna þess að stofnanafjárfestar veita nú miklu fjármunum til kaupa á bitcoin. Allt frá upphafi hefur gengi bitcoin verið mjög sveiflukennt en stóra línan er sú að topparnir hafa ávallt orðið hærri í hvert sinn sem toppi er náð. Jafnan gerist það fljótlega eftir að afrakstur rafnámagraftar á myntinni helmingast, en það gerist á u.þ.b. fjögurra ára fresti. Kjartan Ragnars, regluvörður Myntkaupa, er gestur Ólafs Arnarsonar í hlaðvarpi Markaðarins á Eyjunni.
Markaðurinn - Kjartan Ragnars - 4.mp4
Kjartan segir að hér sé verið að peningavæða eign frá núlli, ekki með reglugerðum eða tilskipunum þar sem ákveðið sé að frá og með einhverri dagsetningu hafi eign tiltekið peningalegt gildi. „Þetta er algerlega að gerast á frjálsum markaði. Ef þú myndir súmma út og taka bitcoin út fyrir sviga og myndir ímynda þér hvernig þannig atburðarás yrði, væri mjög ólíklegt að sú atburðarás yrði bara bein lína upp með engum bakslögum.
Hann segir að þegar horft sé yfir bitcoin ferlið sjáist að tindarnir fari ekki bara hækkandi heldur margfaldist þeir. Aðspurður hvort ekki sé líklegt að bitcoin taki skarpa dýfu fljótlega í ljósi þess að það hefur hækkað skart á skömmum tíma segist Kjartan hafa lært það á þeim fjórum árum sem hann hefur lifað og hrærst í rafmyntaumhverfi að maður hafi litla tilfinningu fyrir skammtímasveiflum á markaði og ekki sé mikið mark takandi á þeim sem segist hafa mikla tilfinningu fyrir þeim. Öðru máli gildi um langtímahorfur.
„Nú er þessi helmingun að fara fram í apríl, eftir rúmlega mánuð. Það sem gerðist síðast, og hefur yfirleitt gerst, og þess vegna er þetta dálítið sérstakt núna og líklegasta skýringin, og raunar eina skýringin sem kemur til greina hvað varðar breytinguna núna, eru þessir sjóðir sem hafa verið að keyra áður óheyrt fjárstreymi inn í bitcoin. En yfirleitt hefur bitcoin náð hæstu hæðum svona 10-15 eða 6-12 mánuðum eftir helmingunina. Svo heldur það þeim toppi í einhverjum sveiflum einhverja mánuði í viðbót. Eftir það hefur markaðurinn ofhitnað, svo kólnar hann allhressilega í sögulegu samhengi, svona 70-80 prósent dýfa eða eitthvað svoleiðis. Svo byrjar hann smám saman að jafna sig þar til þetta gerist aftur.“
Kjartan segir mikilvægt fyrir fólk að átta sig á því að tindarnir fari hækkandi og að skoða framvinduna. Hann segir augljóst að almenningur sé að vakna, nýskráningar hjá Myntkaupum séu nú miklu fleiri á degi hverjum en bara fyrir mánuði en þetta sé samt ekki eins mikið og gerist þegar markaðurinn er alveg í hæstu hæðum en greinilega sé fólk að vakna.
„En fyrst og fremst eru það stofnanafjárfestar sem eru að keyra þetta upp núna. Þeir sem eru mest að kaupa núna, af almenningi, eru þeir sem hafa verið lengi í þessu. Þeir hugsa sem svo: Ég vil vera að kaupa á sama tíma og þessir gæjar eru að kaupa. Til skemmri tíma þarf að hafa aðeins meiri áhyggjur af því að kaupa þegar allir eru að kaupa. Það er til saga af fjárfesti á Wall Street sem átti hlutabréf sem höfðu hækkað mjög mikið og félagarnir voru farnir að segja honum að selja en hann var ekki á því, taldi bréfin eiga eitthvað eftir. Svo var hann að taka leigubíl og leigubílstjórinn fór að tala um þessi hlutabréf. Þá tók hann ákvörðun, ókei, ég ætla að selja þetta.“
