Árið 1982 hertóku Argentínumenn eyjarnar en Bretar brugðust við því með að senda fjölmennt herlið til þeirra og náðu þeim úr höndum Argentínumanna. 255 breskir hermenn féllu í átökunum, þrír heimamenn og 649 Argentínumenn.
Javier Milei, sem tók nýlega við embætti forseta Argentínu, hefur endurvakið kröfur Argentínumanna um yfirráð yfir eyjunum. Hann vill að Bretar afhendi Argentínumönnum þær.
Sky News segir að Cameron hafi sagt að fullveldi eyjanna sé „ekki til umræðu“ svo lengi sem eyjaskeggjar vilja tilheyra Bretlandi. „Falklandseyjar eru mikilvægur hluti af bresku fjölskyldunni og svo lengi sem íbúarnir vilja vera hluti af þessari fjölskyldu, þá er fullveldi þeirra ekki til umræðu,“ sagði hann í yfirlýsingu.
Milei, sem er róttækur frjálshyggjumaður, hét því í kosningabaráttunni að gjörbreyta efnahag Argentínu til hins betra en landið glímir við mikinn efnahagsvanda. Hann hét því einnig að Argentínumenn muni fá yfirráð yfir Falklandseyjum. Hann hefur stungið upp á því að Bretar nálgist málið á svipaðan hátt og þegar þeir afhentu Kínverjum Hong Kong árið 1997. Sá samningur byggðist hins vegar á því að 99 ára leigusamningur var að renna út.
Falklandseyjar hafa verið undir breskri stjórn frá 1833 að undanteknum þriggja mánaða tímabili 1982 þegar Argentínumenn hertóku eyjarnar.
Eyjaskeggjar gengu að kjörborðinu 2013 og létu vilja sinn um framtíðarstöðu eyjanna í ljós. 99,8% studdu áframhaldandi bresk yfirráð. Breskir stjórnmálamenn vísa mjög oft í þessa niðurstöðu þegar Argentínumenn setja fram kröfur um að fá yfirráð yfir eyjunum.