Birgir Ármannsson, fyrrverandi forseti Alþingis, segir að Þórður Snæri Júlíusson sé réttkjörinn þingmaður Samfylkingarinnar eftir kosningarnar um liðna helgi. Hann geti ekki afsalað sér þingmennsku fyrr en þingið hefur staðfest kjör hans á fyrsta þingfundi eftir að þing kemur saman.

Þetta segir Birgir í samtali við Morgunblaðið í dag en eins og kunnugt er tilkynnti Þórður Snær, fyrir kosningar, að hann myndi ekki taka sæti á þingi ef hann næði kjöri. Það gerðist eftir að gömul skrif hans undir dulnefni á bloggsíðu voru gerð opinber.

„Mér sýn­ist að Þórður Snær geti ekki af­salað sér þing­mennsku fyrr en eft­ir að kosn­ing hans hef­ur verið staðfest með at­kvæðagreiðslu á Alþingi á fyrsta þing­fundi, en þetta á sér ekki for­dæmi svo ég viti til,“ seg­ir Birg­ir við Morgunblaðið.

Hann segir að í málsmeðferðarreglum sé það þannig að yfirkjörstjórn kjördæmisins og landskjörstjórn geti ekki annað en skilað af sér þeim úrslitum kosninga sem réttastar eru.

„Ekki er hægt að taka til­lit til al­mennra yf­ir­lýs­inga held­ur eru það kosn­inga­úr­slit­in sem ráða og það ber að skila niður­stöðum í sam­ræmi við það,“ seg­ir Birg­ir við Morgunblaðið.

Bætir hann við að Þórður Snær geti skilað bréfi til forseta Alþingis þar sem hann segir af sér og varamaður hans tekur sætið. Sigmundur Ernir Rúnarsson, fjölmiðlamaður og fyrrverandi þingmaður, mun taka sæti Þórðar Snæs.