Hagar auglýsa eftir umsóknum í nýsköpunarsjóðinn Uppsprettuna. Þetta er í fjórða sinn sem Uppsprettan auglýsir úthlutun og eru allt að 20 milljónir til úthlutunar úr sjóðnum í ár. Umsóknarfrestur er til og með 22. janúar. Þau verkefni sem hljóta styrkveitingu fá jafnframt ráðgjöf og aðstoð við að koma afurðum sínum í verslanir.

Hlutverk Uppsprettunnar er að virkja og styðja frumkvöðla til nýsköpunar og þróunar í íslenskri matvælaframleiðslu. Lögð er sérstök áhersla á stuðning við verkefni sem hafa sjálfbærni að leiðarljósi.

„Eitt af kjarnagildum Haga er að leitast við að hafa jákvæð áhrif á umhverfi og samfélag í allri sinni starfsemi. Sjóðurinn leggur því sérstaka áherslu á stuðning við nýsköpunarverkefni í matvælaframleiðslu sem að taka tillit til sjálfbærni, þar sem hugað er að umhverfisáhrifum við framleiðslu og dreifingu sem og betri nýtingar á hráefnum eða minnkun á matarsóun. Einnig er horft til hvort verkefnið auki verðmætasköpun neytendum til hagsbóta. Að lokum er nýnæmi vörunnar sérstaklega metið og þá hvort að varan sé þegar framleidd á Íslandi,“ segir Anton Birkir Sigfússon, forstöðumaður sjálfbærni hjá Högum.

Alls hafa 32 verkefni hlotið styrk frá því að sjóðurinn var fyrst settur á laggirnar árið 2021 og eru verkefnin afar fjölbreytt. Þar á meðal má nefna íslenskt kimchi frá Sýru, úrvals sósublöndur úr lerki- og furusveppum frá Villt að vestan og vegan „fiskrétti“ úr plöntuafurðum frá Loki Foods.

„Uppsprettan var upphaflega stofnuð til að skapa farveg fyrir þær fjölmörgu hugmyndir sem reglulega berast verslunum Haga. Í gegnum Uppsprettuna fá frumkvöðlar um allt land einstakt tækifæri til að þróa hugmyndir sínar áfram með stuðningi sjóðsins og leiðsögn frá reynslumiklum einstaklingum úr verslun. Sjóðurinn leggur sérstaka áherslu á að hafa umsóknar- og matsferlið einfalt í þeim tilgangi að virkja góðar hugmyndir í matvælaframleiðslu. Við viljum því hvetja alla þá sem búa yfir góðri hugmynd að sækja um og skiptir þá ekki höfuðmáli hvort vöruþróunin sé skammt eða langt á veg komin,“ segir Finnur Oddsson, forstjóri Haga.

Allar nánari upplýsingar og yfirlit styrkhafa má finna á heimasíðu sjóðsins www.uppsprettan.hagar.is