Stjórnmálaflokkarnir hafa misst tengslin við fólkið í landinu vegna þess að ríkið hefur nær alfarið tekið að sér að fjármagna starfsemi þeirra og því þurfa þeir ekki að tala við fólkið og fyrirtækin eins og áður. Aðeins þarf 2,5 prósent atkvæða til að tryggja sér tugi milljóna á ári í styrk frá ríkinu og það gæti verið ein ástæða þess að flokkum hefur fjölga svo sem raun ber vitni. Sjálfstæðisflokkurinn gleymdi því á langri ríkisstjórnarsetu að flokkurinn er í pólitík. Brynjar Níelsson er gestur Ólafs Arnarsonar í hlaðvarpi Eyjunnar.
Eyjan - Brynjar Nielsson - 3
„Þú mátt aldrei gleyma að vera í pólitík þó að þú sért í ríkisstjórn. Því held ég að menn hafi gleymt og verið alltaf í einhverjum málamiðlunum, eðlilega, en aldrei talað fyrir sínu máli. Svo koma bara aðrir flokkar hérna og segja: Ja, ég get alveg átt einhverja samleið þarna alveg eins og Sjálfstæðisflokkurinn. Kannski er bara umhverfið þannig að flokkar eru fleiri og við kannski búnir að búa það til með því hvernig við fjármögnum þetta,“ segir Brynjar.
Ég held að það sé ein ástæða fyrir því að það er breytt flokkalandslag.
„Það voru nú ekki allir í hressir með þetta þegar þessu var breytt, það var m.a. Óli Björn Kárason sem reitti hár sitt. En menn sögðu á móti: Þú getur ekki bannað mönnum að sækja og safna peningum og haft þá ekki ríkisframlag, það verður ekki bæði sleppt og haldið.“
Og það má kannski færa rök fyrir því að hitt sé ekki fullkomið heldur vegna þess að flokkar sem standa fyrir mismunandi hluti þeir hafa mismunandi góða möguleika á að sækja sér fjármagn. En það var einn forystumaður í Sjálfstæðisflokknum sem sagði við mig ekki alls fyrir löngu, hann sagði: Þetta var alveg afleitt þegar þessi ríkisfjármögnun stjórnmálanna var tekin upp vegna þess að fyrir þann tíma þá þurftu sjálfstæðismenn, þá þurfti Sjálfstæðisflokkurinn að fara og tala við t.d. bara fólkið í landinu, fyrirtækin í landinu, þeir þurftu að tala við atvinnulífið vegna þess að þangað þurfti hann að sækja peningana. Nú þarf hann ekki að gera það og nú hlustar hann ekki á atvinnulífið.
„Þess vegna minnka þessi tengsl. Þetta er ekki lengur orðin svona frjáls félagasamtök heldur bara ríkisbatterí. Og þetta held ég, eins og ég held að Óli Björn hafi bara bent á á sínum tíma þegar þetta var til umræðu innan flokksins, það voru miklar deilur um þetta, að þetta yrðu auðvitað bara þróunin. Og þetta er held ég stór þáttur í því að menn stofna jafnvel flokka bara í kringum sjálfa sig. Þú þarft ekki að ná nema einhverjum 2,5 prósentum þá ertu bara kominn með vinnu, tekjur upp á 25 milljónir á ári. Ég get alveg lifað af því. Svo fjármagnar Sósíalistaflokkurinn Samstöðina með vaxtalausum lánum, sem er auðvitað bara gjöf. Þetta er allt fjármagnað úr ríkissjóði.“
En það er ekkert sem bannar þetta?
„Nei, en einhver myndi segja að þetta væri spilling, ef þetta væri Sjálfstæðisflokkurinn, alla vega.“
Einnig er hægt að hlusta á Spotify.
