Formaður bæjarráðs Árborgar, Sveinn Ægir Birgisson, sakar Kristrúnu Frostadóttur, formann Samfylkingarinnar, um að fara frjálslega með sannleikann þegar hún minntist á uppbygginguna í Árborg í leiðtogakappræðum RÚV í síðustu viku. Sveinn hefur nú á móti verið sakaður um að hagræða sannleikanum nokkuð sjálfur.
Kristrún ræddi uppbyggingu innviða og íbúða en Sjálfstæðisflokkurinn skaut ítrekuðum skotum á íbúðaskort í Reykjavíkurborg, þar sem Samfylkingin er í meirihluta, sem og á fjármál höfuðborgarinnar. Kristrún skaut því til baka og benti á Árborg, þar sem Sjálfstæðisflokkur er í meirihluta. Þar hafi menn kynnst því að það er dýrt að brjóta nýtt land og hafi Árborg meðal annars þurft að fara í afturvirka útsvarshækkun þar sem dýrt sé að byggja upp innviði.
Sveinn Ægir tók þessu persónulega og birti pistil á Facebook þar sem hann sagði Kristrúnu fara frjálslega með sannleikann. Álag á útsvar í sveitarfélaginu hafi ekki verið vegna kostnaðarsamrar uppbyggingar innviða og hafi ekki verið sett á afturvirkt. Um var að ræða neyðarúrræði út af grafalvarlegri stöðu sem sveitarfélagið komst í á síðasta kjörtímabili þegar Samfylkingin var við völd í Árborg.
„Þegar nýr meirihluti Sjálfstæðismanna tók við í byrjun sumars 2022 var staðan þannig að sveitarfélagið var rekið með 363.000 króna tapi á klukkustund eða 8,7 milljóna króna tapi á dag! Áætlun gerði ráð fyrir að rekstrartap ársins yrði 3,2 milljarðar. Strax eftir kosningar var gripið til aðgerða og hagrætt í rekstri. Þær aðgerðir báru árangur og í lok árs nam rekstrartapið 2,8 milljörðum króna (sjá mynd 2). Allar götur síðan hefur meirihlutinn unnið ötullega að því að hagræða í rekstrinum og í leiðinni reynt með fremsta móti að standa vörð um velferð íbúa og okkar viðkvæmustu hópa.“
Sveitarfélagið hafi ráðið til sín alltof marga í vinnu og launakostnaður með þeim hæstu á Íslandi. Kristrún ætti því að líta sér nær í staðinn fyrir að benda á aðra.
Þessi pistill vakti hörð viðbrögð meðal þeirra bæjarfulltrúa sem voru í meirihluta á síðasta kjörtímabili í Árborg. Var Sveini bent á að vissulega hafi verið uppsöfnuð innviðaþörf við upphaf síðasta kjörtímabils og það kosti að vinna slíkt upp. Að ógleymdu því að á sama tíma var Ísland að takast á við COVID-19, verðbólgu, hækkandi vexti og svo afleiðingar af innrásinni í Úkraínu. Fólksfjölgun var mikil á síðasta kjörtímabili í Árborg og hefur haldið áfram eftir að nýr meirihluti tók við, sem hefði ekki verið hægt nema út af þeirri uppbyggingu sem var ráðist í.
Aðrir bentu á að Kristrún hafi nú ekki verið að kenna neinum um. Hún hafi bara bent á að Sjálfstæðisflokkurinn í Árborg viti hvað það kosti að byggja upp innviði.
Sigurjón Vídalín Guðmundsson, bæjarfulltrúi Samfylkingarinnar, segir í athugasemd: „Það er nú hálf dapurlegt að væna einhvern um að fara frjálslega með sannleikann en skrifa svo langan pistil í kjölfarið þ.s. bæði er sögð hálf sagan og farið frjálslega með sannleikann í þeim tilgangi annars vegar að reyna réttlæta sig og sinn flokk og hins vegar að skíta út pólitíska andstæðinga.“
Til samanburðar benti Sigurjón á að afkoma ríkis hefði líka farið niður á við á síðasta kjörtímabili út af heimsfaraldrinum.
Tómas Ellert Tómasson, fyrrverandi bæjarfulltrúi Miðflokksins í Árborg, segir um pistilinn: „Þetta er ekki boðlegur málflutningur hjá þér“.Tómas rekur að Sveinn taki ekkert tillit til þeirra utanaðkomandi þátta sem höfðu áhrif á rekstur Árborgar á síðasta kjörtímabili, sem voru fjölmargir, og eins horfi Sveinn ekki til þess að nauðsynlegt var að ráðast í innviðauppbyggingu
Fleiri tóku til máls og gagnrýndu Svein. Einn benti á að honum væri nær að hætta öllu skítkasti yfir fólk sem áður var í bæjarstjórn og halda sig við verkefnið að reka Árborg.
Hvað varðar fullyrðingu Sveins um að útsvar hafi ekki verið hækkað afturvirkt þá var þó fjallað um þetta álag með slíkum hætti í fjölmiðlum og á íbúasíðum þar sem mikillar óánægju gætti með hækkunina og efast var um lögmæti hennar einmitt sökum þess að hún væri afturvirk. Sjá til dæmis hér.
Orðalag í tilkynningu Árborgar um álagið var eftirfarandi:
„Sveitarfélagið Árborg vill vekja athygli íbúa á því að álag var sett á útsvar frá upphafi árs 2024. Þetta þýðir að tekjur sveitarfélagsins munu aukast á þessu ári en áhrifin á skattgreiðendur koma fram í uppgjöri á næsta ári, sumarið 2025.“
Íbúum var því bent á að við álagningu skatts á næsta ári gætu þeir fengið töluvert háa rukkun út af þessu álagi. Til dæmis yrði einstaklingur með mánaðarlaun upp á 833.000 kr. rukkaður um 177 þúsund.
Sjá einnig: Bæjarstjórn Árborgar hækkar skatta á íbúa vegna fjárhagsvanda – Þetta eru hækkanirnar
Eftir stendur spurningin hvort Kristrún hafi farið frjálslega með sannleikann eða hvort það sé svo Sveinn eftir allt saman. Voru álögur hækkaðar með afturvirkum hætti? Veit Sjálfstæðisflokkurinn í Árborg að það er dýrt að brjóta land og byggja upp íbúðir og innviði? Ef svarið er já þá fór Kristrún ekki með fleipur. Ef svarið er nei, þá gæti Sveinn sjálfur þurft að líta sér nær. Ef svarið er já við öðru og nei við hinu, þá eru bæði að hagræða sannleikanum að hluta, en að hluta til sannsögul.
