Miðflokkurinn er miðflokkur, ekki hægri flokkur, segir Guðlaugur Þór Þórðarson, oddviti Sjálfstæðisflokksins í Reykjavík norður. Hann mætti Bergþóri Ólasyni, oddvita Miðflokksins í Kraganum í kosningaþætti á Eyjunni.
Guðlaugur Þór sagði engan mun vera á Miðflokknum og Flokki fólksins, enda kæmu þingmenn og frambjóðendur Miðflokksins að verulegu leyti úr Flokki fólksins. Hann sagði þingmál Miðflokksins ekki vera mörg en af þeim mætti sjá að Sjálfstæðisflokkurinn væri eini flokkurinn sem vildi aðhald í ríkisútgjöldum og skattalækkanir.
Bergþór sagði útgjaldavöxtinn í tíð fráfarandi vinstri stjórnar hafa verið algerlega stjórnlausan. „Við erum að tala um tvöföldun í nafnverðsútgjöldum og rúmlega 40 prósent að raunvirði á þessu tímabili og ég held að það séu mjög fáir sem upplifi að skattborgarar landsins hafi fengið eitthvað fyrir þennan pening. Ég get ekki tilgreint neitt þeirra stoðkerfa okkar; velferðarkerfið, menntamálin, húsnæðismálin og þar fram eftir götunum þar sem staðan er betri í dag heldur en fyrir sjö árum síðan.“ Hann sagði búið að hækka gjöld og skatta og nefndi sem dæmi græn gjöld og skatta. Enginn árangur væri sjáanlegur vegna þessa.
Miðflokkur og Sjálfstæðisflokkur
Guðlaugur sagði að skattar hefðu lækkað um um það bil 300 milljarða króna og ósanngjarnt væri að halda því fram að ekkert hafi verið gert í þeim málaflokkum sem taka mestu fjármunina, annars vegar heilbrigðismálin og hins vegar félagsmálin.
Hann sagði eina þingmál Miðflokksins á þessu kjörtímabili hafa verið útgjaldafrumvarp um að auka stuðning við landbúnaðinn. Frambjóðendur Miðflokksins sem mikið til komi úr Flokki fólksins, t.d. hafi frambjóðandi í Reykjavík norður haft það að keppikefli að koma á ríkisrekinni áburðarverksmiðju.
Bergþór sagði þá lækkun á útblæstri sem Guðlaugur hefði nefnt vera tilkomna vegna tækniþróunar en ekki grænna skatta. Engum ráðherra hefði enn tekist að sýna fram á samhengi kolefnisgjaldanna og þeim miklu álögum sem þeim fylgja og þeim árangri sem hefði náðst.
„Hitt atriðið sem Guðlaugur nefndi, að hér hefði orðið 300 milljarða skattalækkun, en þá verður að hugsa hver núllpunkturinn er í þeim samanburði. Núllpunkturinn er dagurinn þegar Jóhanna og Steingrímur hrökkluðust frá völdum, þegar það var búið að skrúfa alla skatta í topp. Það er samanburðartalan. Sjálfstæðisflokkurinn ætti auðvitað að bera saman, bíddu hvernig er skattheimtan núna miðað við það þegar flokkurinn raunverulega réð hérna ríkjum, 2006 t.d. Hvernig væri skattheimtan í dag ef þau viðmið væru notuð? Ég er hræddur um að þá væri talan í hina áttina.“
Guðlaugur svaraði því til að sjálfstæðismenn hefðu ekki fundið fyrir stuðningi Miðflokksins/Framsóknarflokksins þegar kom að því að afnema skattana. Sjálfstæðisflokkurinn hefði þurft að leiða þá vegferð.
Einnig er hægt að hlusta á Spotify.
