Atli Þór Fanndal, sem ráðinn var til þingflokks Pírata í starf samskiptastjóra í byrjun maí segist feginn að vera laus undan húsbóndavaldi Þórhildar Sunnu Ævarsdóttur, þingflokksformanns flokksins.
„Við erum ótrúlega spennt að fá Atla aftur til liðs við okkur og njóta krafta hans,“ er haft eftir Þórhildi Sunnu í tilkynningu sem send var út 2. maí vegna ráðningar hans. Atli Þór hafði áður starfað fyrir Pírata árið 2017 og 2018 þegar hann starfaði um sex mánaða skeið sem pólitískur ráðgjafi hjá flokknum annars vegar vegna alþingiskosninga 2017 og sveitarstjórnarkosningar 2018.
„Það kemur væntanlega engum á óvart að Píratar séu minn náttúrulegi flokkur,“ sagði Atli Þórs í tilkynningunni um ráðningu hans.
Innan við fimm mánuðum seinna, þann 24. september, var tilkynnt að Atli Þór væri hættur hjá Pírötum.
Atli Þór vandar Þórhildi Sunnu ekki kveðjuna í færslu sinni nú í kvöld:
„Enn einu sinni leyfir Þórhildur Sunna sér að dreifa óhróðri um mig nú í einhverjum spjallþætti. Hún Þórhildur Sunna ákvað að njósna um meðlimi Pírata vegna eigin vænisýki. Taldi einhverja byltingu gegn sér í gangi. Allt saman ímyndun. Það sem er ekki ímyndun er að flokkurinn mælist með helming fylgis, ekkert traust og er að detta út af þingi. Í því sjást leiðtogahæfileikar Þórhildar Sunnu. Hún skoðaði samskipti mín oo annarra Pírata í leyfisleysi, dreifði þeim og fjallaði um. Þegar svo var beðið um afsökunarbeiðni þá var ekki hægt að verða við því heldur fór Þórhildur Sunna sjálf í fjölmiðla og ýjaði að því að hugsanlega sé einhver spilling í þessum samskiptum.“
Segist hann kominn með nóg af því að honum sé gerð upp einhver reiði í þessu máli.
„Píratar eru eitrað vinnuumhverfi og ég fagna því að vera laus undan húsbóndavaldi Þórhildar Sunnu. Sú hugmynd að ég og Þórhildur Sunna höfum verið vinir og það megi nota til að veiða Þórhildi vorkunn er þreytt tugga. Það var enginn vinskapur eyðilagður í þessu máli. Þórhildur Sunna þarf bara að snapp out of it og setja flokkinn sinn ofar svona petty væli. Aðeins þannig getur hún sannfært kjósendur.“
