Besta vinkona Kamala Harris,varaforseta Bandaríkjanna og forsetaefni Demókrata, í framhaldsskóla minnist þess hvernig Harris bjargaði henni með því að veita henni húsaskjól og segir hún Harris hafa breytt öllum framtíðaráformum hennar um leið.
Wanda Kagan og Harris voru samnemendur og vinkonur í Westmount High School í Montreal. Að sögn Kagan vörðu þær miklum tíma saman í skólanum, tóku þátt í ýmsum verkefnum og viðburðum og fóru sem hópur með fleiri vinum á lokaball (e. prom) skólans, sem Kagan segir að hafi verið hugmynd Harris þar sem að sumir vinanna fóru ekki með deit á ballið.
Kagan rifjar upp að einn daginn hafi Harris tekið eftir að Kagan var ekki eins og hún ætti að sér að vera. „Hún spurði mig að lokum hvað væri að. Ég hafði loksins ákveðið að trúa henni fyrir og segja henni frá að stjúpfaðir minn beitti mig líkamlegu og kynferðislegu ofbeldi. Það var erfitt að segja frá, en Harris sagði strax: „Jæja, þú verður bara að koma og búa hjá okkur.“ Í fyrsta lagi vildi hún vita hversu lengi ofbeldið hafði staðið yfir. En ég hafði áhyggjur af hvað mamma hennar myndi segja um að ég myndi flytja inn. Hún hringdi svo í mömmu sína, Shyamala Gopalan, og mamma hennar svaraði að ég mætti flytja til þeirra. Og ég fór heim með þeim strax þennan dag, beint úr skólanum.“
Þetta var árið 1981 þegar vinkonurnar voru á sínu síðasta ári í menntaskóla. Kagan bjó hjá Harris og fjölskyldu hennar í nokkra mánuði. Segist hún loksins hafa fundið fyrir öryggi, en ofbeldi stjúpföður hennar hafði staðið yfir í nokkur ár og varð verra og verra. Hluti af ofbeldinu fólst í því að Kagan fékk ekki að borða og mætti hún því oft með engan hádegismat í skólann.
„Kamala var alltaf með svo góðan hádegismat og fljótlega fór hún að koma með hádegismat handa mér.“
Kagan segir góðvild sem þessa vera forsetaframbjóðandanum eðlislæg og lýsir hún Harris sem samúðarfullri manneskju með náttúrulega verndandi eðlishvöt.
Harris deildi líka sögu sinni á X í október þegar hún upplýsti að það að hjálpa vini sínum væri ein af ástæðunum fyrir því að hún vildi verða saksóknari. Harris sagði Kagan það sama þegar þær endurnýjuðu kynnin árum eftir menntaskólann.
Það slitnaði upp úr vinatengslunum eftir að Harris flutti og fór í Howard háskólann á níunda áratugnum. Árið 2005 þegar Kagan hafði stofnað fjölskyldu og var í farsælu starfi
í heilbrigðisgeiranum hringdi sameiginlegur vinur þeirra í hana og sagði henni að Harris hefði komið fram í þætti Oprah Winfrey, þá orðinn héraðssaksóknari fyrir San Francisco. Kagan fann tengiliðaupplýsingar fyrir skrifstofu Harris og skildi eftir skilaboð áður en dóttir hennar kom til hennar til að tilkynna henni að „vinur hennar frá Oprah“ væri að hringja.
„Ég man eftir því að hafa tekið upp símann og það er eins og, „Guð minn góður, ég trúi ekki að þú hafir hringt í mig aftur. Þú hlýtur að vera með skilaboð frá milljón manns um að hringja í þig,“ segir Kagan um fyrsta samtal þeirra eftir 20 ár. „Og svo sagði hún við mig: „Jæja, þú ert ekki bara hver sem er.“
„Hún hélt áfram að segja mér hversu mikil áhrif ég hafði á líf hennar og hvaða starfsferil hún valdi sér.“ Harris sagði æskuvinkonu sinni frá því að hún hefði valið lögfræðina eftir allt það sem hún gekk í gegnum fyrir og með Kagan, að hjálpa henni og standa upp fyrir hennar hönd.
„Það breytti einhverju innra með mér,“ sagði Harris. Kagan segir að Harris sé enn sama manneskjan og barðist fyrir hana í menntaskóla.
