Samkvæmt nýjustu skoðanakönnunum sækja Flokkur fólksins og Sjálfstæðisflokkurinn í sig veðrið nú á lokametrum kosningabaráttunnar. Þá sýnir nýjasta kosningaspá Metils að Flokkur fólksins, Sjálfstæðisflokkurinn og Miðflokkurinn eru nálægt því að ná hreinum þingmeirihluta og gætu því myndað þriggja flokka meirihlutastjórn.

Orðið á götunni er að gangi það eftir að þessir þrír flokkar nái þingmeirihluta sé margt sem bendir til þess að ríkisstjórn þeirra verði niðurstaðan eftir kosningar. Í kosningaþætti Eyjunnar í vikunni kom fram að ekki skilur svo mikið málefnalega milli þessara þriggja flokka. Flokkur fólksins leggur mikla áherslu á stóraukin ríkisútgjöld til að bæta kjör öryrkja og fleiri hópa sem bera minnst úr býtum í samfélaginu en er ekki fráhverfur því að markaðslausnir séu notaðar fremur en félagshyggjulausnir. Því ættu flokkarnir að geta náð saman í þeim málum.

Sjá: Viðreisn og Flokkur fólksins í lykilstöðu – stóra spurningin hvort Flokkur fólksins, Miðflokkur og Sjálfstæðisflokkur ná þingmeirihluta

Þá er Flokkur fólksins íhaldssamur á ýmsum sviðum, eins og t.d. málefnum hælisleitenda, passar það vel við stefnu Sjálfstæðisflokks og Miðflokks. Ekki ber því málefnalega eins mikið milli þessara flokka og virst gæti við fyrstu sýn. Engu að síður er Flokkur fólksins sá flokkur á þingi sem lengst er til vinstri, nái hvorki VG né Sósíalistar inn á þing. Þetta yrði því þriðja kjörtímabilið í röð sem Sjálfstæðisflokkurinn gengur til stjórnarsamstarf við þann flokk sem lengst er til vinstri.

Þá er eftir að manna stjórnina. Flokksformennirnir þrír taka allir sæti í stjórninni og í hlutarins eðli liggur að þeir verða í lykilráðuneytum. Orðið á götunni er að líklegast sé að Bjarni Benediktsson verði áfram forsætisráðherra og að Sigmundur Davíð Gunnlaugsson verði innviðaráðherra. Í fjármála- og efnahagsráðuneytið sest þá Inga Sæland.

Orðið á götunni er að ríkisstjórn Sjálfstæðisflokksins, Flokks fólksins og Miðflokksins gæti litið um það bil svona út:

• Bjarni Benediktsson forsætisráðherra
• Inga Sæland fjármála-og efnahagsráðherra
• Sigmundur Davíð Gunnlaugsson innviðaráðherra
• Ragnar Þór Ingólfsson mennta-og barnamálaráðherra
• Þórdís Kolbrún Reykfjörð Gylfadóttir heilbrigðisráðherra
• Gunnar Bragi Sveinsson utanríkisráðherra
• Jens Garðar Helgason matvælaráðherra
• Bergþór Ólason menningar- og viðskiptaráðherra
• Áslaug Arna Sigurbjörnsdóttir háskóla-, iðnaðar og nýsköpunarráðherra
• Sigurjón Þórðarson umhverfis-, loftslags- og orkumálaráðherra
• Karl Gauti Hjaltason dómsmálaráðherra
• Guðmundur Ingi Kristinsson félagsmálaráðherra

Líklegast er að ráðherrar hvers flokks yrðu fjórir og Sjálfstæðisflokkurinn fengi forseta Alþingis að auki. Þar myndi valið standa milli Guðrúnar Hafsteinsdóttur og Guðlaugs Þórs Þórðarsonar og orðið á götunni er að Guðrún yrði fyrir valinu og þar vegi þungt að hún er kona af landsbyggðinni.

Sjá hér: Inga vísar hugmyndum um stjórnarsamstarf við Bjarna og Sigmund Davíð á bug

Inga Sæland hefur þvertekið fyrir það að ríkisstjórnarsamstarf með Sjálfstæðisflokknum komi til greina. Mörgum finnst ósennilegt að Ragnar Þór Ingólfsson vilji slíkt samstarf. Orðið á götunni er hins vegar að þegar ráðherrastólarnir og kjötkatlarnir blasa við eftir kosningar reynist oft harla auðvelt að gleypa ofan í sig prinsippin og ná málamiðlunum.

Orðið á götunni er að atkvæði greitt Flokki fólksins sé ávísun á að Sjálfstæðisflokkurinn verði leiddur til stjórnarforystu og að atkvæði greitt Sjálfstæðisflokknum sé ávísun á að Flokkur fólksins komist í ríkisstjórn og jafnvel í fjármálaráðuneytið.