Bjarni Benediktsson lýsti því yfir í vikunni að þeir flokkar sem hann vill helst vinna með í ríkisstjórn eftir kosningar séu Miðflokkurinn, Viðreisn – á góðum degi – eins og hann orðaði það og Flokkur fólksins.
Fylgi Sjálfstæðisflokksins hefur aldrei mælst minna en einmitt núna þótt orðið á götunni sé að flokkurinn muni fá fleiri atkvæði upp úr kjörkössum á laugardag en kannanir gefa til kynna. Engu að síður hafa flestir talið ólíklegt að flokkurinn verði í næstu ríkisstjórn.
Viðreisn, sem hefur verið á mikilli siglingu og aukið fylgi sitt jafnt og þétt eftir því sem nær dregur kosningum, er væntanlega minnug þess hvernig fór þegar flokkurinn fór í stjórnarsamstarf með Sjálfstæðisflokknum 2017. Að líkindum er það fyrst núna sem flokkurinn er að jafna sig á þeirri stjórnarþátttöku og mjög ólíklegt að Viðreisn horfi til Sjálfstæðisflokksins sem heppilegs samstarfsflokk í ríkisstjórn enda mikið sem skilur þessa flokka að í stórum málum.
Miðflokkurinn hefur átt góðu gengi að fagna í kosningabaráttunni þótt aðeins virðist hafa fjarað undan fylgisaukningu flokksins á lokametrunum. Flokkur fólksins hefur hins vegar færst í aukana upp á síðkastið og virðist vera að toppa á réttum tíma.
Samkvæmt kosningaspá Metils um helgina fá Sjálfstæðisflokkurinn, Miðflokkurinn og Flokkur fólksins samtals 31 þingsæti og nokkrar líkur eru á því að flokkarnir fái hreinan meirihluta á Alþingi. Boðuð tíðindi varðandi fylgi Flokks fólksins í skoðanakönnun Maskínu, sem birt verður á fimmtudag, gefa til kynna að miklar líkur séu á því að þessir þrír flokkar geti myndað meirihlutastjórn eftir kosningar.
Orðið á götunni er að í ljósi þess að Bjarni Benediktsson er nú farinn að tala hlýlega til Flokks fólksins sem mögulegs samstarfsflokks í ríkisstjórn og þeirrar stöðu sem skoðanakannanir og kosningaspár gefa til kynna sé ríkisstjórn Sjálfstæðisflokks, Miðflokks og Flokks fólksins að verða mjög líkleg eftir kosningar. Ekki ætti að vera vandamál fyrir Sjálfstæðisflokkinn og Miðflokkinn að vinna saman og báðir flokkar séu til í að kosta til miklu til að Viðreisn og Samfylkingu verði haldið frá ríkisstjórnarborðinu.
Orðið á götunni er að ljóst sé að ríkisstjórn Sjálfstæðisflokks, Miðflokks og Flokks fólksins myndi í senn stórauka ríkisútgjöld til að stórbæta kjör öryrkja fyrir Flokk fólksins og lækka skatta, sem bæði Sjálfstæðisflokkur og Miðflokkur tala fyrir. Einnig megi búast við því að auðlindagjöld verði lækkuð. Afleiðing útgjaldaaukningar og skattalækkana er hallarekstur og mun því ríkið þurfa að sækja í enn meiri mæli en nú er inn á fjármálamarkaði eftir lánsfé. Hagfræðingar vita að útkoman úr slíku er aukin verðbólga og hærri vextir en ella. Hætt er við að fljótt hrikti í stoðum íslensks atvinnulífs og heimila undir slíkri stjórnarstefnu.
Ef að líkum lætur ná hvorki VG né Sósíalistaflokkurinn inn á þing í kosningunum og því verður Flokkur fólksins sá flokkur sem lengst verður til vinstri á Alþingi eftir kosningar. Orðið á götunni er að athyglisvert sé, eftir reynsluna af sjö ára vinstristjórnarsamstarfi með VG, að Bjarni Benediktsson skuli ætla að endurtaka leikinn og reyna að mynda stjórn þvert yfir pólitíska litrófið á þingi.
Bjarni Benediktsson og Sjálfstæðisflokkurinn hafa í þessari kosningabaráttu varað við „vinstri slysum“ og „vinstri beygjum“. Orðið á götunni er að þau aðvörunarorð séu tilkomin af þungbærri reynslu sjálfstæðismanna af eigin vinstri beygjum og vinstri slysum í vinstristjórninni sem hér hefur setið frá 2017. Enginn þekkir afleiðingar slíkra slysa betur en einmitt sjálfstæðismenn.
Orðið á götunni er að þau leynist víða vinstri slysin.
