Allt bendir til þess að framundan séu sögulega slæmar kosningar fyrir Sjálfstæðisflokkinn en skoðanakannanir benda til þess að flokkurinn fái undir 15% fylgi sem myndi flokkast sem algjört afhroð í sögulegu samhengi. Fjölmiðlakonan Snærós Sindradóttir tók saman skemmtilegan pistil um yfirvofandi fylgishrun flokksins á bloggsíðu sinni undir yfirskriftinni „Hann er bara ekkert hot lengur“ . Þar fer hún stuttlega yfir kosninganiðurstöður flokksins á þessari öld en versta niðurstaða flokksins var 24,2% fylgi í kosningunum árið 2021.
Snærós bendir á ýmislegt hafi gengið á á þessu kjörtímabili.
„Hvalveiðamálið hefur verið þvílík hringavitleysa, seinni Íslandsbankasalan er eitt allsherjar klúður (og sú fyrri líka, fyrir okkur sem trúum á þá hagfræði að sígandi lukka sé best og það borgi sig að láta hagnaðinn mjatla inn frekar en að taka þann stóra einu sinni… en það er aukaatriði), verðbólga og stýrivextir hafa gert stemninguna á Íslandi mjög súra,“
Þá rifjar hún upp viðtal við Bjarna Benediktsson í Þjóðmálum fyrir nokkru, sem hún hlustaði á við baðherbergisþrif, sem að setið hefur í henni síðan
„Sumsé, í þeim þætti talar Bjarni um innflytjendamálin á þeim grunni að þau hafi unnið kosningar um gervalla Evrópu og að íslenskir stjórnmálamenn þurfi að fara að horfa til þeirra fordæma. Þetta viðtal hefur setið svolítið í mér síðan. Þá varð mér fyrst ljóst að Bjarni vildi gera innflytjendamálin að kosningamáli, til að verjast fylgistapinu aktívt, miklu frekar en að þau stæðu svo í kokinu á honum í raun og veru. Taktík, frekar en einhver pólitísk sannfæring,“ skrifar Snærós.
Það sé ljóst að þessi taktík hafi hrapalega mistekist hjá Bjarna og flokknum. Ástæðan telur Snærós að sé einföld:
„Íslenska þjóðin hefur fyrirgefið ótrúlegustu skandala í hjónabandi sínu við Sjálfstæðisflokkinn, af því hann er enn bara svo heillandi og hot eiginmaður. Við fáum enn fiðring – þrátt fyrir öll svikin, brigslin og hliðarsporin. Fyrir sum er Sjálfstæðisflokkurinn ómótstæðilegur; sterkur, sannfærandi og kannski ekki alltaf fullnægjandi, en ég get breytt honum.
En þegar eiginmaðurinn er sestur í húsbóndastólinn, með dregið fyrir stofugluggana, og bölvar öllum um ógæfu sína nema sjálfum sér – þá fellur hratt á hann. Þegar eiginmaðurinn er hættur að bursta í sér tennurnar og stendur og glápir út um rifu á gluggatjöldunum á útlendu fjölskylduna sem er að koma sér fyrir í næsta húsi, þá er þessu hjónabandi sjálfhætt. Það klæðir sig enginn upp fyrir slíkan þurs. Og þjóðin virðist ekki ætla að mæta á kjörstað fyrir þann gæja. Vælandi Sjálfstæðisflokkur er bara ekkert sexý þegar við munum eftir Sjálfstæðisflokki í rokna stuði. Við vorum sjúk í hann lengi, en hann er bara ekkert hot lengur,“ skrifar fjölmiðlakonan.
Hér má lesa færslu Snærósar í heild sinni
