Að gefnu tilefni í aðdraganda kosninga langar mig að fullyrða að óheiðarlegir stjórnmálamenn valda samfélaginu mun meiri skaða en þeir sem láta niðrandi orð falla um einstaka hópa.

Á Íslandi hefur spilling í stjórnkerfinu verið landlæg um áratugaskeið, með þeim afleiðingum að heilbrigðis-, mennta-, húsnæðis- og félagskerfi hefur hrakað stöðugt. Hverjir verða hest fyrir barðinu á spillingu sem rífur niður innviði? Konur og börn.

Hér lest Steinun Ólína okkur pistilinn:

steinunnolina 8 221124

Þótt hatursorðræða sé óásættanleg, er hún oft sýnileg og auðvelt að benda á hana. Spillingu er hins vegar hægt að fela á bak við fögur orð og loforð en hún hefur langtíma áhrif sem grafa markvisst undan grunnstoðum samfélagsins.

Langvarandi spilling eins og við höfum búið við dregur úr siðferði, eykur vantraust og veikir samfélagslega sáttmála þá sem þurfa að ríkja í samfélögum. Þann sáttmála að við berum öll sameiginlega ábyrgð á velferð annars fólks.

Spilling tryggir framgang sérhagsmunaaðila á kostnað nauðsynlegrar þjónustu fyrir almenning.

Hvernig samfélag viljum við reka hér?

Þeir spilltu hindra raunverulega umbótasinna í að komast til valda og beita jafnvel fjölmiðlum og öðrum úrræðum til að halda völdum.

Við höfum reynsluna af stjórnmálafólki sem þykist annað en það er. Úlfarnir í sauðargærunum sem þykjast vera lýðræðissinnar en eru í raun að grafa undan sjálfstæði okkar.

Margir auglýsa sig rétt fyrir kosningar í nýjum dulbúningum en hafa því miður ekkert annað í hyggju heldur en að halda áfram uppteknum hætti eftir kosningar. Að selja undan okkur landið svo útvaldir fái á því grætt.

Við þurfum að hafna þeim sem ítrekað hafa orðið uppvísir að óheiðarleika í næstu kosningum. Kjósum þau sem okkur sýnist vera ærleg og heil og hafa sýnt og sannað vilja sinn til að setja hagsmuni almennings ofar sérhagsmunum.

Það er eina leiðin til að verja réttindi og velferð kvenna og barna og annarra viðkvæmra hópa og byggja upp samfélag sem leggur áherslu á réttlæti og jöfnuð.

Konur og börn geta ekki þolað meiri niðurskurð á grunnþjónustu.

Í komandi kosningum er mikilvægt að við tökum afstöðu gegn spillingu og í þágu framtíðar fyrir alla.