Framsóknarflokkurinn birtir á bæði Facebook-síðu sinni og síðu sinni á Instagram brot úr um 40 mínútna löngu myndbandi, sem er í heild sinni á Youtube-síðu flokksins. Myndbandið ber titilinn Eldhússpjall með Sigurði Inga. Í brotinu sem flokkurinn gerir á þennan hátt sérstaklega hátt undir höfði gagnrýnir Sigurður Ingi Jóhannsson formaður flokksins harðlega framgöngu Sjálfstæðisflokksins í stjórnarsamstarfinu á þessu kjörtímabili. Hann segir Sjálfstæðisflokkinn hafa verið í raun stjórnlausan og því mjög erfiðan í samstarfi og þá í mun meiri mæli en nokkurn tímann í sögu flokksins. Sjálfstæðisflokkurinn hafi verið helsta vandamálið í ríkisstjórninni á þessu kjörtímabili og að eftir á að hyggja hefði verið best að slíta stjórnarsamstarfinu strax á síðasta ári.
Eins og kunnugt er mynduðu Framsóknarflokkurinn og Sjálfstæðisflokkurinn ríkisstjórn ásamt Vinstri-grænum eftir alþingiskosningar 2017 sem síðan var endurnýjuð eftir kosningarnar 2021. Sigurður Ingi segir samstarfið hafa gengið sérstaklega illa á þessu síðara kjörtímabili:
„Staðreyndin er hins vegar sú að á þessu seinna kjörtímabili þá hefur samstarfið niðri á þingi milli stjórnarflokkanna verið mjög lélegt, afleitt. Mjög fljótlega kom í ljós að Sjálfstæðisflokkurinn var ósáttur við að vera í þessari ríkisstjórn og einstakir þingmenn hans fóru bara beinlínis í stjórnarandstöðu. Í ljós kom smátt og smátt og hefur kannski bara verið að raungerast í rúmt eitt og hálft ár að það var mjög erfitt að vera í samstarfi við Sjálfstæðisflokkinn. Því hann var á einhvern hátt stjórnlaus. Menn gerðu bara það sem þeim datt í hug og komust upp með það. Þannig hefur það aldrei verið í sögu Sjálfstæðisflokksins, ekki núna seinni áratugina.“
Andrés Jónsson almannatengill og stjórnmálaskýrandi vekur athygli á því á Facebook að Framsóknarflokkurinn hafi kosið að gera þessu broti úr myndbandinu sérstaklega hátt undir höfði.
„Hinn orðvari formaður Framsóknarflokksins loksins að segja það sem mér fannst alltaf augljóst: að Sjálfstæðisflokkurinn var óstýrláti flokkurinn í þessari ríkisstjórn, en ekki Vinstri græn.“
Björn Ingi Hrafnsson fjölmiðlamaður og stjórnmálaskýrandi segir á X að þessi orð Sigurðar Inga séu stórmerkileg:
„Sjálfstæðisflokkurinn stjórnlaus?! Þetta eru alveg stórmerkileg og hápólitísk skilaboð frá formanni Framsóknarflokksins á lokadögum kosningabaráttunnar. Ætlar framsókn að reyna að bjarga sér með vinstri snúningi?“
Um Vinstri græna segir Sigurður Ingi í heildarútgáfu myndbandsins á Youtube-síðu Framsóknarflokksins að þingmenn þeirra hafi ekki verið eins öflugir á þessu seinna kjörtímabili stjórnarsamstarfsins. Ólíkir skoðanir flokkanna hafi kallað á lausnamiðaða nálgun í stjórnarsamstarfinu sem hafi gengið mun verr hjá Vinstri grænum en á fyrra kjörtímabilinu. Aðalvandamálið í stjórnarsamtarfinu hafi hins vegar verið Sjálfstæðisflokkurinn sem hafi ekki verið samstarfsfús:
„Hann vann aldrei að lausnum. Í mjög langan tíma ekki bara síðustu mánuðina. Bara í mjög langan tíma.“
Sigurður Ingi segir að litlu hafi munað að hann hefði lagt til við þingflokk Framsóknarflokksins í janúar á þessu ári að slíta stjórnarsamstarfinu en þá hafi stjórnarflokkunum tekist að ná saman um útlendingamál. Hann segir að eftir á að hyggja hefði verið heppilegra að slíta stjórnarsamtarfinu enn þá fyrr:
„Eftir á að hyggja hefði verið réttast að átta sig á því að þegar Sjálfstæðisflokkurinn gat ekki klárað ein einustu þingmál ríkisstjórnarinnar vorið ’23 að þá hefðum við átt að segja nú er nóg komið.“
