Haukur V. Alfreðsson, doktorsnemi í Hagfræði og eigandi Ráðsölunnar ehf., segir Sjálfstæðisflokkinn nú reyna að slá ryki í augun á millistéttarfólki. Flokkurinn tali um skattalækkanir eins og þær eigi að gagnast millistéttinni þegar markmiðið er í raun að aðstoða stóreignafólk. Þetta kemur fram í grein Hauks sem birtist hjá Vísi í dag.

Haukur bendir á að eitt kosningaloforð Sjálfstæðisflokks sé að helminga erfðafjárskatt og fjórfalda frítekjumarkið. „Hér er þó í reynd verið að slá ryki í augun á millistéttarfólki. Gefa þeim smá mylsnu en virkilega aðstoða stóreignafólk.“

Hann bendir á að þegar um millistéttina er að ræða þá sé erfðafé að miklu bundið við fasteign, eða heimili viðkomandi arfleifanda. Þegar fólk er efnað þá sé gjarnan um fjölbreytt eignasafn að ræða. Gjarnan sé þá um að ræða verðbréf sem hafi aukist mikið að verðmætum frá því að þau voru keypt og aldrei greiddur fjármagnstekjuskattur af virðisaukningunni.

„Þannig er erfðafjárskatturinn fyrsta skattlagning þess látna af stórum hluta þessara eigna ef hann var eignamikill og því mun helmingun erfðafjárskattsins veita erfingjum hans meiriháttar skattaafslátt“

Eðlilegra væri að breyta aðeins frítekjumörkunum, ef markmiðið væri í raun að bæta hag meðalmanneskjunnar. En með því að lækka skattprósentuna samhliða þá sé þessi breyting til þess fallin að gagnast stóreignafólki mun meira en öðrum stéttum.