Samfélagslögregla er jákvætt verkefni en mikilvægt er að efla lögregluna til rannsókna á flóknum og umsvifamiklum sakamálum sem teygja anga sína yfir landamæri. Skipulögð glæpastarfsemi er nú staðreynd hér á landi og lögreglan er vanbúin til að bregðast við af þeim krafti sem þyrfti vegna fjársveltis á undanförnum árum. Færri lögreglumenn eru á höfuðborgarsvæðinu nú en fyrir 17 árum þegar lögreglustjóraembættin á svæðinu voru sameinuð undir einum hatti. Á sama tíma hefur íbúðum og ferðamönnum fjölgað. Þorbjörg Sigríður Gunnlaugsdóttir, oddviti Viðreisnar í Reykjavíkur suður, og Orri Páll Jóhannsson, sem er í öðru sæti hjá VG í sama kjördæmi, eru gestir í kosningasjónvarpsþætti á Eyjunni.
Í þessum kosningum verður kosið um efnahagsmál og heilbrigðismál, ekki síst geðheilbrigðismál ungs fólks. Um það eru Þorbjörg Sigríður og Orri Páll sammála.
HB_EYJ203_NET.mp4
Aðspurð segir Þorbjörg Sigríður að löggæslan hér á landi hafi verið fjársvelt á undanförum árum. „Þetta er minn gamli geiri, ég starfaði um tíma hjá lögreglustjóranum á höfuðborgarsvæðinu frá því að það embætti varð til, 2007. Þá voru sameinuð lögreglustjóraembættin á öllu höfuðborgarsvæðinu undir einn hatt. Lögreglumönnum síðan þá hefur fækkað talsvert hér á höfuðborgarsvæðinu á sama tíma og hér hefur orðið alger sprenging í fólksfjölda og á sama tíma og hér hefur orðið mikill vöxtur í ferðaþjónustu.“
Hún telur öfluga löggæslu mikilvæga m.a. með hliðsjón af því að standa vörð um geðheilbrigði ungs fólks. Mikilvægt sé t.d. að lögreglan sé nógu vel mönnuð til að geta gripið snemma inn í aðstæður í borginni um helgar þar sem oft á í hlut ungt fólk.
Orri Páll tekur undir þessi orð um fjölda lögreglumanna. Hann telur þó verkefnið um samfélagslögreglu dæmi um hluti sem verið sé að gera vel. Nú sé fram undan í þinginu að loka fjárlögum og taka afstöðu til fjármögnunar verkefna eins og t.d. samfélagslögreglunnar. Hann telur þennan sýnileika lögreglunnar jákvæðan og gera eigi meira og betur í þeim efnum. Hópur ungs fólks sem eigi í verulegum vandræðum sé ekki endilega mjög stór.
Hann vill þó ekki sjá aukna vopnvæðingu lögreglunnar eða rafbyssuvæðingu og eru þau sammála um að lausnin felist ekki í því að vopnvæða heldur verði að efla lögregluna með því að fjölga lögreglumönnum og gera lögregluna sýnilegri. Þetta eigi við bæði hér á höfuðborgarsvæðinu þar sem þunginn er vegna mannfjölda og úti á landi þar sem umdæmin eru víðfeðm en mannekla í lögreglunni.
Þorbjörg Sigríður segir það þjóðaröryggismál að manna lögregluna vel. Nú, þegar við upplifum skipulagða glæpastarfsemi eins og tíðkast í öðrum löndum dugi ekki samfélagslögreglan heldur þurfi líka að efla lögregluna hvað varðar rannsóknir á umfangsmiklum og flóknum sakamálum sem teygja sig yfir landamæri.
Orri Páll segist ekki vera ósammála þessu en vill leggja áherslu á að ekki sé endilega hægt að tengja fjölbreytt þjóðerni við aukna glæpatíðni, Íslendingar brjóti líka af sér. Hann segir að í umræðunni sé stundum rætt um að breyttri samfélagsskipan fylgi aukin glæpatíðni. Hann segir þau Þorbjörgu Sigríði ekki hafa alið á þessari umræðu en tölurnar sýni að Íslendingar séu líka í hópi þeirra sem brjóta af sér, fyrir þá sem hafa áhyggjur af þjóðerni í þessu. Hann tekur hins vegar undir það að mikilvægt sé að eiga samskipti yfir landamærin og þar megi geri betur.
Einnig er hægt að hlusta á Spotify.
