Danir voru á liðnum öldum ákaflega þreyttir á nýlendunni sinni norður í höfum. Þjóðin var óþreytandi að skrifa alls konar kvörtunarbréf til konungs. Danskir embættismenn skildu heldur ekki allan þann fjölda meiðyrðamála sem rekin voru í íslenska dómskerfinu. Íslenskir höfðingjar dvöldust langdvölum í Kaupmannahöfn í málarekstri út af tapaðri æru. Íslendingar hafa því alltaf verið þrasgjarnir og móðgunargjarnir og þeir eiginleikar hafa blómstrað á tímum netmiðla. Ekki verður þverfótað fyrir móðguðu fólki sem gjarnan móðgast fyrir hönd annarra. Allt er túlkað á versta veg og fólk skrifar langhunda á facebook um margvísleg ágreiningsmál. Þegar formaður Samfylkingar lítilsvirti Dag fyrrum borgarstjóra móðguðust netverjar mun meira en hann sjálfur.

Nýr borgarstjóri Framsóknarflokksins kom inn í pólitíkina með látum og tókst að móðga fjölmarga. Hann talaði óvarlega um kennara og vinnutíma þeirra og tíð veikindi og fékk alla stéttina upp á móti sér. Sárveikir kennarar í kulnunarástandi risu úr rekkju og gengu fylktu liði niður í ráðhús til að mótmæla. Þeir sögðust vilja vera sem mest með börnunum í kennslustundum en þeir þyrftu bara mun lengri tíma í einrúmi til að undirbúa kennsluna og biðjast fyrir. Íbúar í Grafarvogi eru borgarstjóra reiðir vegna þess að hann vill þétta byggðina þar eins og í öðrum bæjarhlutum. Borgarstjóri má hafa sig allan við að biðjast fyrirgefningar á ummælum sínum.

Móðgaða þjóðin lætur ekkert tækifæri fram hjá sér fara til að fara í fýlu og ásaka náungann um tillitsleysi, valdhroka og skort á samráði og gagnsæi. Einar borgarstjóri verður að átta sig á því að innst inni í íslenskri þjóðarsál blundar kúgaður og fýlugjarn alþýðumaður sem á harma að hefna á yfirvöldum. Hann er alltaf móðgaður og því breytir ekkert. Það er affarasælast að leiða þetta sármóðgaða fólk hjá sér og reyna ekki að biðjast afsökunar enda hefur það ekkert að segja.