Einnig er hægt að hlusta á Spotify. 

„Allir ríkisstjórnarflokkarnir eru í ákveðnum áskorunum skulum við segja. Við höfum lagt áherslu á það í þessum deilum sem hafa verið og ég hef lagt áherslu á það í mínum störfum, í þessum deilum milli ysta vinstrisins og hægrisins, að einbeita okkur að okkar verkefnum og okkar störfum. Það hef ég gert í mínu ráðuneyti, bæði í menntamálunum, barnamálunum, íþróttunum, og ég trúi því að þegar við komumst út og förum að segja frá því, þá muni þetta nú koma,“ segir Ásmundur Einar.

Hann segir það ekkert nýtt að Framsókn hafi staðið tæpt á höfuðborgarsvæðinu, staðan nú sé ekkert dekkri en hún var í aðdraganda þess að hann flutti sig úr Norðvesturkjördæmi til Reykjavíkur á sínum tíma. „Lengi vel framan af þar var ég ekki að mælast inni. Það er hins vegar svo að ég brenn fyrir þau störf sem ég hef verið að vinna. Ég hef fundið það núna þegar við erum að komast út á meðal fólks bara núna síðustu vikuna, þegar við erum að hefja þessa baráttu, að það er stuðningur við það og og það hefur kveikt neistann enn meira því að ég trúi því að við þurfum að nálgast verkefnin eins og við höfum verið að gera, með samvinnu, samstarfi ólíkra aðila, en um leið stíga miklu fastar inn þegar kemur að stuðningi við börn, stuðningi við fjölskyldur og stuðningi við fjölskyldufólk.“

Hann segir að í þessu stjórnarsamstarfi hafi vissulega verið áskoranir, mjög mikilvægt sé að næsta ríkisstjórn taki mun fastar á þeim málum.

En bendir fylgi stjórnarflokkanna ekki einfaldlega til þess að kjósendur séu að senda þau skilaboð að ríkisstjórnin hafi ekki staðið sig vel?

„Ég held að það hafi talsverð áhrif, þessar gríðarlegu vaxtahækkanir sem hafa verið, og aðli máls samkvæmt þá þá hefur það áhrif þegar kemur að fylgi, skárra væri það, það að greiðslubyrði lána hækki og verð hækki vegna vaxtahækkana og annað hefur áhrif á venjulegar fjölskyldur og það er ánægjulegt að sjá að vaxtalækkunarferlið er að byrja að komast í gang núna.“

Ásmundur Einar gagnrýnir bankana fyrir að vera of frekir til vaxtanna og bendir á að Lilja Alfreðsdóttir, viðskiptaráðherra, hafi sagt þá taka of mikið til sín. Hann telur ástæðu til að stíga fastar inn í þeim málum alveg eins og stíga verði ákveðnar inn í þágu barnafjölskyldna og varðandi húsnæðisstuðning almennt.

„Mér hefur fundist skorta á það að við næðum pólitískt saman um að við stigjum fastar inn gagnvart ungu fólki sem er að stíga inn á fasteignamarkaðinn. Ég man eftir því þegar ég var húsnæðisráðherra á síðasta kjörtímabili og við vorum að koma svonefndum hlutdeildarlánum á, sem hafa núna aldeilis sannað gildi sitt, og eru að gera það að verkum að ungt fólk er að komast inn á húsnæðismarkaðinn, að svona „Borgartúnshægrið“ á Íslandi barðist mjög gegn því að hlutdeildarlánin næðu fram að ganga; sendu umsagnir til þingsins um að þetta væri stórhættulegt og myndi brengla húsnæðismarkaðinn o.s.frv.“