Sigmundur Davíð veitti því eftirtekt að ungir sjálfstæðismenn höfðu hann að háði og spotti fyrir að vera alltaf í sömu jakkafötunum. Hann viðurkennir að hann eigi vissulega bara tvenn eða þrenn sem passa og því var hann rekinn í næstu herrafataverslun enda tók engin mark á yfirlýsingum hans um metnaðarfullt þyngdartap fyrir kjördag. Ónefndur þingmaður Miðflokks hafi þó nýtt tækifærið til að ná höggi á formanninum og lagði til að Sigmundur leitaði heldur í verslun sem hefði örugglega hans stærð. Seglagerðina Ægi. Þingmenn Miðflokks eru sem stendur tveir, þó það standi til bóta samkvæmt nýjust skoðanakönnunum. Því var það líklega Bergþór Ólason sem fór með grínið, nema það hafi verið Sigmundur sjálfur.

Sigmundur skrifar á Facebook:

„Ég sá að einhverjir ungir sjálfstæðismenn gerðu grín að því að ég væri alltaf í sömu jakkafötunum (einhverra hluta vegna er ég þeim hugleikinn).
Ok, ég skal viðurkenna að ég á bara tvenn eða þrenn jakkaföt sem passa eftir að ég bætti á mig (og þau eru eins). En talandi um „umbúðir umfram innihald”!
Óháð því var ég þó rekinn í herrafataverslun (því enginn trúði því að ég næði að missa 20 kíló fyrir kosningar).
Ónefndur þingmaður Miðflokksins spurði hvort ekki hefði verið betra að senda mig bara beint í Seglagerðina Ægi.
Þetta er það sem ég bý við.“

Hann birtir svo mynd af sér í jakkafatamælingu þar sem hann er raunamæddur á svip, mögulega yfir meinfýsnum brandaranum, mögulega yfir því að þurfa að splæsa í jakkaföt.