Dagur B. Eggertsson, borgarfulltrúi og fyrrverandi borgarstjóri, segir að sér hafi brugðið þegar hann las umdeilt bréf sem Kristrún Frostadóttir, formaður Samfylkingarinnar, sendi á ónafngreindan kjósanda sem var ósáttur við að Dagur yrði ofarlega á lista Samfylkingarinnar í Reykjavík.
Þar áréttaði Kristrún að Dagur stýrir ekki Samfylkingunni heldur gerir hún það og þá myndi borgarstjórinn fyrrverandi ekki verða ráðherra. Það lægi beinast við fyrir viðkomandi að strika Dag út í kjörklefanum ef honum hugnaðist hann ekki.
Dagur var gestur í Silfrúnu á RÚV núna í kvöld. Þar spurði Sigríður Hagalín Björnsdóttir, stjórnandi þáttarins, Dag hvernig honum hefði liðið við að sjá skilaboðin sem virtust hreinlega gera lítið úr honum.
„Ég skal viðurkenna að mér brá svolítið þegar ég sá þetta. Mér fannst það nú breyta svolítið samhenginu að þetta voru persónuleg skilaboð sem síðan var lekið. En það sem skiptir mig mestu að við Kristrún hittumst í gær og áttum einlægt og gott samtal um þetta. Og við erum samherjar, skildum sátt og snúum bökum saman. Þannig að þessu máli er bara lokið að minni hálfu,” sagði Dagur.
Aðspurður sagði Dagur að segja mætti að Kristrún hefði beðið hann fyrirgefningar á bréfinu umdeilda.
„Allavega vorum við sammála um að þetta væri ekki heppilegt. Þannig að já, kannski fór helgin í þetta. Ég hef auðvitað fundið það að það brá fleirum en mér og verð kannski bara að þakka fyrir gríðarlega mikið af skilaboði og stuðningi og öðru slíku. En mér finnst eiginlega svolítið mikilvægt að segja við það fólk, og bara alla, að núna finnst mér rosalega mikilvægt að missa ekki taktinn eða dampinn út af einhverju svona heldur að allir sem vettlingi geta valdið leggist með okkur á árarnar því framundan eru rosalega mikilvægar kosningar, það er mjög stutt í það. Ég er þannig gerður að ég á mjög auðvelt að setja svona bak við mig ef ég finn einlægni og traust,” sagði Dagur meðal annars.
