Fyrir komandi kosningar er mikilvægt að vera vakandi þegar stjórnmálaflokkar velja oddvita sína, þar sem ákvarðanir um náttúruauðlindir og auðæfi landsins eru í húfi. Aðeins með stjórnarskrárákvæðum er hægt að koma í veg fyrir misnotkun auðlinda svo hægt sé að tryggja að arður þeirra renni í opinbera sjóði sem styðji við almannahagsmuni
Nú skiptir máli að velja af kostgæfni stjórnmálafólk sem hefur ástríðu fyrir landinu okkar og er tilbúið að verja það fyrir komandi kynslóðir. Fólk sem ekki hefur beinna hagsmuna að gæta. Lítum á.
Sjálfstæðisflokkurinn hefur valið sér nýjan oddvita í Norðvesturkjördæmi, lyfsala á Akranesi og jafnframt formann Þróunarfélags Grundartanga.
Hér má heyra Steinunni Ólínu lesa okkur pistilinn:
Steinunn Ólina pistill 4 - 251024.mp4
Elkem, Veitur, CarbFix, Ferðamála-, iðnaðar- og nýsköpunarráðherra Sjálfstæðisflokks og áðurnefndur Norðvestur-oddviti skrifuðu árið 2021 undir viljayfirlýsingu um að vinna saman að gjörnýtingu á Grundartangasvæðinu.
Sú viljayfirlýsing hefur skilað samfélagi sínu meðal annars eftirfarandi:
Trjákurls-fjöllum sem Running Tide skildi eftir sig á Grundartanga, fjöllum sem verða víst brennd til að knýja málmblendi Elkem sem rekur þar kísilver og lagði íslenska ríkið í héraðsdómi fyrir skemmstu. Með úrskurðinum lækkuðu skattskil Elkem um ríflega átta hundruð milljónir.
Lítt megum við okkar gegn Elkem sem skapar reyndar aðeins um 170 störf í landinu. Munum að dómskerfið er þéttskipað Sjálfstæðisfólki.
Við skulum heldur ekki gleyma að í embætti forstjóra Umhverfis- og orkustofnunar situr nú fyrrum stóriðjuforstjóri PCC BakkiSilicon, framkvæmdastjóri Veitna, forstjóri Elkem Ísland og framkvæmdastjóri öryggis-, heilbrigðis- og umhverfismála hjá Elkem Ísland.
VG og XD þóttu sá maður hæfastur til að fara fyrir þeirri stofnun sem fer með stjórnsýslu og eftirlit sem og önnur verkefni á sviði loftslags-, umhverfis- og orkumála og málefni auðlindanýtingar.
Stjórnarflokkarnir hefðu rétt eins geta talið Grýlu heppilegasta í embætti barnamálaráðherra.
Nú er áformað að reisa landeldisstöð á Katanesi, austan við verksmiðju Norðuráls á Grundartanga. Þar er nýtt félag á ferðinni, Aurora fiskeldi ehf. með norska og íslenska fjárfesta þar sem framleiða á fjórtán þúsund tonn af laxi árlega. Aurora fiskeldi eiga þeir sem áður áttu Laxar Fiskeldi, sem er í eigu Kaldvíkur, þar sem enginn annar en nýr Oddviti Sjálfstæðisflokksins í Norðausturkjördæmi er aðstoðarforstjóri!
Kaldvík er kauphallarskráð fiskeldisfélag fyrst í Noregi og nú á Íslandi og er eina eldisfyrirtækið á Austfjörðum með eldi á Reyðarfirði, Fáskrúðsfirði og Berufirði auk leyfis til að ala ófrjóan lax á Stöðvarfirði. Félagið hefur sótt um leyfi til að ala allt að 10 þúsund tonn á Seyðisfirði, þar af 6.500 tonn af frjóum laxi. Seyðfirðingar í miklum meirihluta hafa mótmælt því harðlega eða um 75% íbúa.
Innan Kaldvíkur eru fiskeldisfélögin Ice Fish Farm/Fiskeldi Austfjarða, Laxar Fiskeldi, fiskvinnsla Búlandstinds á Djúpavogi auk seiðaeldisstöðva við Kópasker, Kelduhverfi og Þorlákshöfn. Aðeins 200 starfsmenn eru í vinnu hjá Kaldvík.
Nýlega var tilkynnt um að níu störf væru orðin til á Djúpavogi við fóðrun í fiskeldi á Austfjörðum sum sé frá árinu 2020 hefur fjölgað um eina vakt, eða tvo starfsmenn hjá Kaldvík, á hverju ári. Rífandi atvinnutækifæri!
Það má dást að því hversu haganlega Sjálfstæðisflokkurinn hefur komið í oddvitasæti í Norðaustur og Norðvestur þeim mönnum sem ekki þarf stærðfræðing til að skilja hvert hlutverk er. Einfaldlega að greiða götu sérhagsmuna.
Verði Sjálfstæðisflokkurinn í nýrri ríkisstjórn að loknum kosningum munu fyrirsjáanlega draumar heimamanna í Norðaustur og Norðvestur um græna velsæld að engu verða. Ábatadraumar fárra um einhæfa og mengandi starfsemi fjarða á milli munu hins vegar rætast með ófyrirsjáanlegum afleiðingum fyrir allt og alla.
Fáir munu brosa við bjöllum kauphallarinnar þegar auðæfi sem með réttu ættu að vera landsmanna renna lóðbeint í vasa norskra auðkýfinga og íslenskra skósveina þeirra.
#SaveIceland #BjörgumÍslandi
