Fjölmiðlamaðurinn Egill Helgason segist ekki skilja hver vegna sumir séu að gagnrýna að frægir Íslendingar séu að bjóða sig fram til Alþingis. Þetta sé reynslumikið fólk sem hafi mikið fram að færa. Frekar ætti fólk að kvarta undan því að Íslandi sitji upp með atvinnumenn í pólitík sem margir hafa farið sömu leiðina inn á Alþingi.
Egill bendir á þetta á Facebook þar sem hann skrifar: „
„Ekki skil ég tuð yfir því að fólk hokið af reynslu skuli gefa sig að þingmennsku. Hélt að frekar hefði verið kvartað yfir því að erfitt væri að fá hæft fólk til þingsetu – og við sætum uppi með mikið af atvinnumönnum í pólitík sem hafa farið hefðbundinn tröppugang (ungliðahreyfing, aðstoðarmaður ráðherra, kannski smá blaðamennska).“
Egill telur að það sé fagnaðarefni að reynslumikið fólk gefi kost á sér. Þetta sé fólk með reynslu úr tilteknum mikilvægum málaflokkum, svo sem heilbrigðiskerfi, löggæslu, orkumál og verkalýð.
„Ég sé ekki betur en að það sé fagnaðarefni að fólk eins og Alma Möller, Víðir Reynisson, Halla Hrund Logadóttir, Ragnar Þór Ingólfsson, Sólveig Anna Jónsdóttir og Jens Garðar Helgason setjist e.t.v. á þing. Alma með reynslu úr heilbrigðiskerfinu, Víðir gjörkunnugur lögreglu- og öryggismálum. Halla Hrund úr orkumálunum. Ragnar og Sólveig úr verkalýðshreyfingunni, Jens Garðar úr sjávarútvegnum. Og kannski gleymi ég að nefna einhverja – en að kenna þetta við tækifærismennsku er fásinna. Svo ég bæti við þá er löng hefð fyrir því að verkalýðsforingjar setjist á þing – ég gæti rutt upp úr mér fjölda nafna en það bíður betri tíma. Jú, ég gleymi hinum reynslumikla Jóni Gnarr með bakgrunn í borg og menningu.“