Jón Gnarr, fyrrverandi borgarstjóri og nýr liðsmaður Viðreisnar, segir að ekki hafi verið mikill sómi að því hvernig við enduðum aðildarviðræður við Evrópusambandið árið 2015.

Jón skrifaði færslu á Facebook-síðu sína í gærkvöldi þar sem hann varpaði þessari skoðun fram.

„Það var allt með einstaklega hallærislegum hætti gert, án umræðu í þinginu og svo var þjóðin svikin um kosningaréttinn sem henni hafði verið lofað. Ég vil taka upp þráðinn þar sem frá var horfið og klára þetta litla sem eftir er. Ég vil fá skýran samning á borðið, gefa fólkinu í landinu tíma til að vega og meta kosti og galla inngöngu og halda svo þjóðaratkvæðagreiðsluna sem okkur var lofað. Power to the people!“

Með færslu sinni deildi Jón frétt Heimildarinnar þess efnis að aldrei hafi fleiri verið hlynntir aðild Íslands að ESB en einmitt nú. Eru 45,3% landsmanna nú hlynnt aðild Íslands að ESB, samkvæmt könnun Maskínu. Umrædd könnun var framkvæmd fyrir Evrópuhreyfinguna dagana 16. til 24. september og voru svarendur 1.067 talsins.

Jón fylgdi svo færslunni í gærkvöldi eftir með annarri færslu í morgun þar sem hann færði rök fyrir því að aðild Íslands að Evrópusambandinu myndi efla íslenska tungu.

„Ef Ísland gengur í Evrópusambandið, myndi landið enn hafa fulla stjórn á þeim stefnumálum sem snúa að tungumálinu og menningarmálum. Þvert á móti gæti aðild jafnvel fært með sér fjárhagslegan stuðning til verkefna sem miða að því að varðveita tungumál minnihlutahópa, þar á meðal íslensku, eins og sést í öðrum löndum innan sambandsins,“ segir Jón meðal annars í færslu sinni í morgun.

Vísir greindi frá því í síðustu viku að Jón væri kominn í Viðreisn og ætli að bjóða fram krafta sína í komandi Alþingiskosningum. Jón var í framboði til forseta Íslands í vor og fékk 10,1% atkvæða í kosningunum.