Áslaug Arna Sigurbjörnsdóttir, háskóla-, iðnaðar- og nýsköpunarráðherra, kom með óvænta játningu í hlaðvarpinu Bakherbergið í umsjón Þórhalls Gunnarssonar og Andrésar Jónssonar. En þar sat hún fyrir svörum ásamt Þorbjörgu Sigríði Gunnlaugsdóttir úr Viðreisn.
Áslaug og Þorbjörg , eða Obba eins og hún er kölluð, fengu nokkrar léttar og svo þungar hraðaspurningar.
Þær voru alveg sammála í fyrstu spurningunum. Báðar styðja afnám á einkasölu ÁTVR á áfengi, báðar vilja samræmd próf í grunnskóla og báðar vilja leyfa starfsemi veðlánafyrirtækja.
Svo fengu þær spurningu um hvort þær styðja upptöku á nýjum gjaldmiðli. Obba er hlynnt, en Áslaug er það ekki.
Næsta spurning var hvort að þær vilja þjóðaratkvæðisgreiðslu um mögulega inngöngu í Evrópusambandið. Obba var fljót að svara því að hún sé hlynnt því. Flestir hefðu búist við neikvæðu svari frá Áslaugu en þarna kom hún á óvart.
„Ef þær eru í upphafi kjörtímabils, þá gæti ég stutt þær í ríkisstjórnarsamstarfi áður en farið er í viðræðurnar.“
Þáttastjórnendur voru gáttaðir: „BÚMM. Þarna kom fréttin!“
Áslaug var beðin um að skýra þetta nánar og hún útskýrði að ef þjóðaratkvæðisgreiðsla færi fram til að kanna hug þjóðarinnar á að ganga til viðræðna við Evrópusambandið, þá gæti hún stutt slíkar hugmyndir í upphafi kjörtímabils, að því gefnu að Sjálfstæðisflokkur væri í ríkisstjórn.
„Já ég gæti tekið umræðu um það ef við myndum ríkisstjórn aftur.“
Þáttastjórnendur sáu fyrir sér að þarna hafi möguleikar Sjálfstæðisflokks á nýjum samstarfsflokkum aukist nokkuð. Áslaug var þó fljót að útskýra að hún treysti þjóðinni þó slá hugmyndir um Evrópusambandsaðild af borðinu.
„Ég hef engar áhyggjur af því að þjóðin myndi samþykkja það,“ sagði Áslaug og hló dátt og tók svo af öll tvímæli: Ég vil ekki að við göngum í Evrópusambandið.
Lokahraðaspurningin varðaði svo mögulega samstarfsflokka. Obba var spurð hvort hún vildi heldur starfa með Sjálfstæðisflokk eða Samfylkingu í ríkisstjórn. Fyrst sagðist hún ekki geta gert upp á milli. Hún komst þó ekki upp með afstöðuleysi og var krafin um svar.
„Ok þá verð ég bara „on brand“ í stjórnarandstöðu og segi Samfylkingin.“
Áslaug var að sama bragði spurð hvort hún vildi heldur starfa með Viðreisn eða Samfylkingu í ríkisstjórn. „Viðreisn,“ sagði Áslaug án þess að hika og skaut svo á Obbu: „Mér finnst Samfylkingin of vinstrisinnuð en Viðreisn ætlar greinilega að halla sér þangað,“ sagði Áslaug kímin.
Uppfært:
Áslaug sá ástæðu til skýra betur afstöðu sína í samtali við mbl.is sem birtist rétt á eftir þessari grein í dag. Þar tók hún fram að hún hafi alla tíð verið andvíg aðild að Evrópusambandinu og orð hennar í Bakherberginu hafi átt að benda á að það sé ekkert til sem heitir þjóðaratkvæðisgreiðsla eftir viðræður við Evrópusambandið, eins og gjarnan sé talað um. Eina samtalið sem sé hægt að taka færi fram áður en viðræður hefjast.
