Einnig er hægt að hlusta á Spotify. 

„Þetta er alveg búið að vera merkilegt að fylgjast með hvað þau eru orðin ótrúlega opin með það hvað þeim gengur ótrúlega illa og dugleg við að rífast hvert við annað opinberlega. Þetta er auðvitað búið að vera staðan mjög lengi, við sáum þetta mjög skýrt í kringum hvalveiðimálið í fyrra þegar hver stjórnarþingmaðurinn á fætur öðrum var í því að hóta vantraustsstuðningi og öðru gagnvart ráðherra, svikabrigsl milli manna og ekki bara það heldur ásakanir um alvarleg lögbrot á hendur matvælaráðherra,“ segir Þórhildur Sunna.

Hún segist líka telja að hrikt hafi í stoðum stjórnarsamstarfsins í Íslandsbankamálinu. „Ég spurði einmitt forsætisráðherra í óundirbúnum fyrirspurnatíma í gær, þá rifjaði ég upp fyrir honum grein sem hann skrifaði fyrir kosningar þar sem hann var að – ég ætla bara að orða þetta pent fyrir hann – þar sem hann var að vara kjósendur við að ef þeir myndu ekki kjósa Sjálfstæðisflokkinn þá færi allt í upplausn, og hann lýsti þessu sem svo að það skipti öllu máli hvort að eftir kosningar tæki við sundurlaus samtíningur margra flokka eða öflug ríkisstjórn sem er fær um að geta tekist á við stórar áskoranir og leyst úr vandamálum.“

Þórhildur Sunna segir að í sömu grein hafi Bjarni Benediktsson fjallað um að ef Sjálfstæðisflokkurinn yrði ekki við völd myndi verðbólgan rjúka upp úr öllu valdi og vextir á húsnæðislánum með. „Ég sagði að kjósendur Sjálfstæðisflokksins hafi örugglega ekki grunað að þar væri hann að fara með öfugmæli, að við tæki sundurlaus samtíningur Sjálfstæðisflokks, Vinstri grænna og Framsóknar, að húsnæðislán myndu rjúka upp úr öllu valdi og að verðbólgan yrði stjórnlaus.“

Hún segist hafa bent á það sem blasi við öllum, að þessi mál sem þau segist hafa sameinast um; efnahagsmálin, útlendingamál og orkumál – í fyrsta lagi sé ljóst að almenningur treysti þeim ekki í þessum málum, verðbólgan hafi fengið að vera svo gott sem stjórnlaus í heilt kjörtímabil og sömuleiðis að útlendingamálin og orkumálin séu bara alls ekki í forgangi hjá kjósendum. Fyrir utan það þá sé VG búin að lýsa því yfir að það verði ekki breytingar á útlendingamálum. „Þórdís Kolbrún, varaformaður Sjálfstæðisflokksins, var nú bara síðast í gær eða fyrradag að lýsa því yfir að þau kæmust ekkert áfram í orkumálunum út af þessu samstarfi sem þau væru í. Bjarni sagði í viðtali við Mbl.: Til hvers að kjósa í vor? Það fer nú allt eftir því hvernig okkur gengur með þessi mál – útlendingamálin, orkumálin og efnahagsmálin – og ég tók bara undir með honum: Til hvers að kjósa í vor? eigum við ekki bara að kjósa núna strax?“