Þingflokkur Sjálfstæðisflokks var óvænt boðaður á þingflokksfund. Fundurinn hófst rétt í þessu og var fyrirvarinn mjög skemmur. Mbl.is greindi fyrst frá fundinum. Ólga hefur verið innan ríkisstjórnarsamstarfsins í vikunni, en Vinstri græn hafa gefið út að þau ætli sér ekki að gera meira í útlendinga- og orkumálum á kjörtímabilinu. Sjálfstæðismenn eru þar að auki sagðir ósáttir með að Svandís Svavarsdóttir, nýr formaður Vinstri Grænna, sagðist opinberlega vilja kosninga í vor, en þetta hafði hún ekki rætt við formenn hina stjórnarflokkanna.

Einn viðmælandi fréttastofu RÚV segir að tilefni fundarins í dag sé að ræða ríkisstjórnarsamstarfið, og því velta menn því fyrir sér hvort að stjórnin sé að falla. Að sögn RÚV eru ekki áform um önnur fundarhöld, en ekki er búið að boða þingflokksfund hjá Vinstri grænum.

Þórdís Kolbrún Reykfjörð Gylfadóttir, utanríkisráðherra, sagði í samtali við mbl.is í morgun að flokkurinn væri tilbúinn í kosningar. Áslaug Arna Sigurbjörnsdóttir, háskóla-, iðnaðar-, og nýsköpunarráðherra sagði eðlilegt að þingflokkurinn velti fyrir sér næstu skrefum í ríkisstjórnarsamstarfinu, hvort forsendur séu fyrir að klára kjörtímabilið ef ekki er hægt að klára mál sem Sjálfstæðisflokkur hefur lagt ríka áherslu á. Vísaði Áslaug þar væntanlega til útlendinga- og orkumála.