Ríkisstjórnarsamstarf þvert yfir pólitíska litrófið er fullreynt. Æskilegt er að næsta ríkisstjórn samanstandi af flokkum sem séu á svipuðum hluta pólitíska litrófsins, hvort sem það verði mið-hægri samstarf um uppbyggingu og verðmætasköpun eða að félagshyggjuflokkarnir fái að spreyta sig. Bergþór Ólason, þingflokksformaður Miðflokksins, er gestur Ólafs Arnarsonar í hlaðvarpi Eyjunnar.
Eyjan - Bergþór Ólafsson
„Ég held að þessir flokkar gætu alveg verið eitt af þeim mynstrum sem gætu gengið upp. En svo heyrði ég t.d. haft eftir Áslaugu Örnu á fundi að hún sæi fyrir sér sem draumasamstarf Sjálfstæðisflokks, Viðreisnar og Miðflokks er er þá væntanlega að horfa í borgaralega þenkjandi mið-hægri,“ segir Bergþór.
Hann segist skynja að í þinginu núna sé fleiri samstarfsmöguleikar milli flokka en áður var raunhæft. „Borðið er opnara.“
Kannski verður það arfleifð þessarar kyrrstöðustjórnar, sem er þvert yfir pólitíska litrófið, að opna á samstarf milli flokka sem áður áttu erfitt um vik?
„Já, já, og ég er þeirrar skoðunar að það sé æskilegt – ég hef haft allt á hornum mér gagnvart þessari ríkisstjórn, tjónið er bara svo mikið sem þetta hefur valdið – en ég held að það sé æskilegt að það verði reynt að forma ríkisstjórn sem hefur skýra stefnu og þeir sem þar eru inni séu ekki í því eins og Vinstri grænir að meginmarkmiðið sé að koma í veg fyrir að Sjálfstæðisflokkurinn komi málum í gegn.
Hvort sem sú ríkisstjórn er til vinstri eða hægri eða hvaða ása við erum að horfa á þá held ég að þjóðin þurfi skýrari pólitíska stefnu heldur en verið hefur. Þess vegna held ég að það sé líklegast og æskilegast að sú stjórn sem verður formuð, hvernig sem hún verður samsett, verði af svipuðum hluta pólitíska rófsins. Það verði þá farið í að keyra á uppbyggingu, verðmætasköpun, betri meðferð fjármuna og þar fram eftir götunum í einhverju mið-hægri samstarfi, nú eða þá að það verði farið í – miðað við að það verði niðurstöður kosninganna – að félagshyggjuflokkarnir nái öflugri stöðu, þá fá þeir tækifæri til að spreyta sig og við sjáum hvernig vinnst úr því – frá miðju til vinstri. En þessi breiða skírskotun eins og einhver kallaði það. Hún er fullreynd.“
Einnig er hægt að hlusta á Spotify.
