Þetta sagði þjóðaröryggisráðgjafi Biden, Jake Sulivan, á laugardaginn að sögn AFP. Sullivan sagði einnig að Biden hyggist funda með Volodymyr Zelenskyy, forseta Úkraínu, í lok september í tengslum við allsherjarþing Sameinuðu þjóðanna í New York. Munu þeir ræða um stuðning Bandaríkjanna við Úkraínu.
„Zelenskyy hefur sagt að stríðinu muni að lokum ljúka með samningum. Við verðum að tryggja að Úkraína standi vel að vígi í samningaviðræðunum,“ sagði Sullivan og bætti við að það sé Úkraínumanna að ákveða hvenær þeir vilja taka þátt í samningaviðræðum við Rússland.
Biden lætur af embætti í janúar og þá tekur annað hvort Kamala Harris, varaforseti hans, við embættinu eða Donald Trump sem er forsetaframbjóðandi Repúblikana.
Harris hefur gefið í skyn að hún muni halda sig við stefnu Biden í málefnum Úkraínu ef hún verður kjörin forseti. Trump hefur ekki viljað svara hvort hann telji að Úkraína eigi að sigra í stríðinu.
