Krónan er mengað blóð í efnahagskerfinu hér á landi og gerir okkur erfiðara fyrir og heldur uppi hærri þrýstingi í kerfinu en þyrfti að vera. Það er ekki í erfðaefni okkar Íslendinga að lifa við óstjórn. Eftir heila öld er fullreynt með íslensku krónuna, sem á þeim tíma er orðin 1/2000 hluti af þeirri dönsku, en var fyrir rúmri öld 1/1. Þórólfur Matthíasson er viðmælandi Ólafs Arnarsonar í hlaðvarpi Eyjunnar.
Markaðurinn - Þórólfur Matthíasson - klippa 6.mp4
Ég get ekki annað en komið inn á gjaldmiðilinn. Það hefur verið bent á það að við erum dálítið sér á parti, og það sem skilur okkur að – það er bent t.d. á Færeyjar, sem eru með mjög svipað hagkerfi og við, kannski ekki alveg eins fjölbreytt. Þar er bara allt annað vaxtaumhverfi, enda er færeyska krónan bundin dönsku krónunni, sem er bundin evrunni, þannig að það má segja að færeyska krónan sé í raun og veru evra í gegnum dönsku krónuna. Hér erum við með sjálfstæðan gjaldmiðil og við erum með miklu hærra vaxtastig, við erum með miklu meiri sveiflur. Þorsteinn Pálsson hefur iðulega fjallað um þetta í pistlum, m.a. á Eyjunni. Er þetta ekki eitthvað sem við verðum að skoða?
„Mikil ósköp. Það er alltaf gaman að lesa það sem Þorsteinn skrifar. Ég var ekki alltaf sammála honum hér í fyrri tíð, en ég held að við séum orðnir meira sammála heldur en við vorum, meira að segja um sjávarútvegsmálin, en það er önnur saga. En, já, þetta er alveg hárrétt, þetta skiptir máli. Menn hafa verið að segja: þetta er svona vangaveltuefni – það er alveg hægt að haga hagstjórninni þannig að íslenska krónan virki alveg eins og hver annar gjaldmiðill – alvöru gjaldmiðill – en erum við ekki búin að vera að reyna það?“
Það er heil öld að baki. Við byrjuðum með íslensku krónuna í 1/1 á móti dönsku krónunni. Nú er danska krónan tvöþúsund sinnum stærri en sú íslenska. Það er tuttugu sinnum, en við tókum tvö núll af þeirri íslensku fyrir rúmum 40 árum. Já, er þetta ekki fullreynt?
„Ég myndi nú halda það. Það er sumt sem er þannig að í teoríunni á það alveg að ganga og svo þegar maður fer að reyna að lifa eftir teoríunni þá bara gengur það ekki upp. Við verðum bara að fara að viðurkenna að svo sé. Á árum áður þá var hægt að nota krónuna til þess að halda uppi háu atvinnustigi, en þá var heldur engin alvöru hagstjórn í gangi, menn voru ekkert að reyna að stjórna þessu.“
Þórólfur rifjar upp að hann las ævisögu Jóhannesar heitins Nordal. „Það var hálfsorglegur lestur að lesa um efnahagsstjórnina; mjög gaman að lesa bókina og hann gæfumaður í sínu lífi. En að sjá hvernig menn á 5., 6. og 7. áratugnum voru að berja höfðinu við steininn og halda að það þyrfti ekki að hafa neina forsjá gagnvart efnahagsmálunum. Og það eimir af þessu enn þá. Það er ekkert í erfðaefni okkar Íslendinga að lifa við óstjórn, en hins vegar getum við sagt það að við búum við mengað blóð í efnahagslíkamanum, og þetta mengaða blóð er krónan sem gerir okkur erfitt fyrir og heldur uppi hærri þrýstingi í kerfinu heldur en þyrfti að vera.“
Einnig er hægt að hlusta á Spotify.
