Jóhannes Þór Skúlason, framkvæmdastjóri Samtaka ferðaþjónustunnar, segir Samfylkinguna boða hindranir á ferðaþjónustuna. Krefur hann Kristrúnu Frostadóttur, formann, um svör um hvaða aðgerðir flokkurinn hyggist beita.

Í færslu á samfélagsmiðlum vísar Jóhannes til ummæla Kristrúnar í Kastljósi á RÚV í gærkvöldi. Þar sagði hún meðal annars um ferðaþjónustuna:

„Þegar atvinnugrein er farin að ryðja sér leið inn á heimili fólks, að húsnæðismarkaðurinn stendur ekki undir því að fólk þarf að kaupa sér heimili vegna þess að fólk er að nýta þau sem gistiheimili þá hljótum við að þurfa að fara að horfa á hvaða aðgerðir þarf að grípa til.“

„Það var ekki hægt að skilja orð formanns Samfylkingarinnar í Kastljósi í gær öðruvísi en að Samfylkingin ætli sér að leggja svo harkalegar hindranir á ferðaþjónustu að það dragi verulega úr verðmætasköpun hennar fyrir samfélagið. Hún sagði beinlínis að það þyrfti þá að auka aðra verðmætasköpun á móti,“ segir Jóhannes Þór í færslunni. „Ég er almennt ánægður með það þegar stjórnmálamenn hætta að tipla í kring um hlutina eins og köttur um heitan graut, en því fylgir þá að þeir verða að standa fyrir máli sínu um þær aðgerðir sem þeir hyggjast grípa til – og afleiðingar þeirra.“

Í Kastljósi í gær útskýrði Kristrún ekki hvaða aðgerðir þyrfti að grípa til. Jóhannes krefur hana um svör um það.

„Eftir þessa augljósu yfirlýsingu í Kastljósi í gær hlýtur því að vera eðlileg krafa að Kristrún Frostadóttir útskýri nú hvaða beinu stjórnvaldsaðgerðum Samfylkingin ætlar að beita sem skerða rekstrarumhverfi ferðaþjónustunnar svo harkalega að það muni draga verulega úr verðmætasköpun hennar fyrir samfélagið? Því að það er eina leiðin til að gera það sem hún er að boða,“ segir Jóhannes. „Það eru margir sem bíða svars eftir þetta útspil í gær.“