„Við sem trúum á kraftaverkin vorum sérlega glöð yfir stuðinu á Sigurbirni frá Laugum, sem lýsti hverri frjálsíþrótt sem er af bítandi ákefð. Það gerði hann á þann hátt, að við sem ekki erum innvígðir í tæknimál íþróttanna eða gamlir afreksmenn (!) skiljum næsta auðveldlega. Gunnar Birgisson, sem oft virðist einkum vera að tala til innvígðra, gæti margt af honum lært,“
segir Össur Skarphéðinsson fyrrum ráðherra, þingmaður og formaður Samfylkingarinnar. Össur gefur RÚV háa einkunn fyrir Ólympíuleikana.
„Þeir glöddu mitt sumar og það sem ég gat ekki horft á um daga eyddi ég nóttum í. Edda Sif Pálsdóttir gerði mig líka glaðan í hverri Ólympíustofu og hefur einstakan skjáþokka með látlausu og smitandi vestmanneysku brosi.“
Í færslu á Facebook segist Össur þó hafa verið glaðastur með og dáðst sérstaklega að hinum ýmsu „sérfræðingum” sem voru kallaðir til vegna einstakra greina.
„Hvílíkt lið! Ég dáðist að íslenskunni sem flest þeirra töluðu, skýrleikanum í máli þeirra, hvernig þau gátu talað á íslenskri tungu um tækni viðkomandi greinar, og hvað þau yfirhöfuð virtust prýðilegar vitsmunaverur. Af minni eigin sjálfumgleði minntu þau á sjálfan mig þegar ég fæ að tala um urriða!
Gildir einu hvort um var að ræða snillinginn sem talaði um sundið yfir í unga konu sem talaði um golf, drengina sem skýrðu galdra körfuboltans og svo gæti ég lengi fram haldið. Hvar finnur RÚV svona flott fólk? RÚV fær tíu fyrir þá fundi. Þau sýndu manni hvað íslenskt mál nýrra kynslóða á tölvuöld og enskuvæðingu heimsins er lifandi, og hvað það hefur mikla aðlögunarhæfni.“
Össur segir að í þessu vakra stóði hafi verið einn sem stóð upp úr og heillaði hann öðrum fremur. „Það var Ari Bragi Kárason, sem ég veit ekkert um en dr. Árný segir mér að þeyti lúður og sé djassisti. Kannski er hann gamall Íslandsmeistari í einhverju, hvað veit ég. Hann talaði hins vegar á meistaralegri íslensku af ástríðu um hvaðeina sem fyrir bar á Ólympíuleikunum af slíkri snilld að ég varð eiginlega innblásinn í hvert sinn. RÚV á sérstakar þakkir skildar fyrir að hafa leitt allt þetta snilldarfólk á okkar fund.
Það er eitthvað við Ólympíuleikana sem gerir mann bjartsýnan á að þetta volaða mannkyn eigi sér þrátt fyrir allt einhverja von um framtíð og frið.“
Til gamans má geta að Ari Bragi er fótfráasti maður Íslandssögunnar, en hann hóf að stunda spretthlaup 25 ára gamall árið 2014. Árið 2016 sló hann þá 19 ára gamalt Íslandsmet Jóns Arnars Magnússonar og bætti það svo ári síðar og stendur met hans, 10,51 sekúnda, enn óhaggað. Árið 2021 tilkynnti Ari Bragi að hann væri hættur spretthlaupum og sagði tíma kominn til að sinna öðrum hugðarefnum.
