Vanskil og greiðsludráttur hefur aukist merkjanlega og hratt bæði hjá fyrirtækjum og heimilum, samkvæmt tölum frá Motus. Þá er einnig farið að bera á vanskilum fólks og fyrirtækja í bönkunum, ef marka má hálfsársuppgjör Landsbankans. Þetta kemur fram í viðtali Ólafs Arnarsonar við Jón Bjarka Bentsson, aðalhagfræðing Íslandsbanka, á Markaðnum

Hér má hlusta á stutt brot úr viðtalinu:

Markadurinn - Jón Bjarki Bentsson- 2.mp4

„Núna sjáum við t.d. í júní að kortavelta heimila var að minnka að raungildi milli ára og af væntingakönnun hjá fyrirtækjum heyrum við að það ver verið að halda í við sig með fjárfestingar og það er ekki bara einhverjar tölur á blaði, það þýðir að þarna eru vörur og þjónusta sem ekki er þá keypt og störf sem ekki þarf að manna við uppbyggingu í fjárfestingunni þannig að það bætist við þennan utanaðkomandi þátt í útflutningnum,“ segir Jón Bjarki.

Nú hefur verið talað um það í nokkra mánuði, jafnvel misseri, að yfirdráttarlán heimilanna séu í sögulegum hæðum, yfir 100 milljarðar, og það hefur verið orðað þannig að yfirdráttarlán séu í raun dulbúin vanskil. Hvernig er með vanskil í bankakerfinu, eru þau að aukast?

Að sögn Jóns Bjarka eru vanskil í bankakerfinu aðeins farin að mjakast upp. Hann bendir á að aðeins liggi fyrir árshlutauppgjör frá einum stóru bankanna. Uppgjör Landsbankans hafi á heildina litið verið ágætt en í tölunum hafi komið fram að vanskil og greiðslufrestir séu að aukast.

„Það sem er kannski athyglisverðast, á meðan við höfum ekki heildartölurnar frá hinum bönkunum, er nýleg greining sem Motus, innheimtufyrirtækið, var að birta. Þau hafa verið dugleg, sem er mjög gott, þeirri leitni og því sem er að gerast …“

Þau hafa náttúrlega puttann á púlsinum þegar kemur að vanskilum …

„Og það er svo hratt, þau sjá þetta strax, og þar eru þau að merkja nokkuð hraða aukningu í vanskilum og greiðsludrætti bæði hjá fyrirtækjum og heimilum. Þetta er hægt að sjá á vefnum þeirra og ég hvet þá sem hafa áhuga til að skoða þetta því að þetta er mjög fróðlegt og ég held að við ættum að horfa til þessa ekki síður en vanskilatalna hjá bönkunum því að þarna höfum við beina mælingu á vanskilum til þeirra sem eru að rukka fyrir vörur og þjónustu.“

Hægt er að hlusta á hlaðvarpið í heild sinni hér :