Á borgarstjórnarfundi fyrr í dag samþykkti meirihluti borgarstjórnar auknar fjárheimildir upp á 25 milljónir króna til skrifstofu borgarstjóra. Er fjármununum ætlað að mæta breytingum í starfsmannamálum skrifstofunnar. Hildur Björnsdóttir, oddviti Sjálfstæðisflokksins, greinir frá þessu á Facebook-síðu sinni. Setur hún hækkunina í samhengi við afar óvinsæla aðgerð Reykjavíkurborgar sem sneri að því að stytta opnunartíma sundlauga um klukkustund um helgar. Í stað þess að loka kl.22 þá loka sundlaugarnar nú k.21.

„Það er áhugavert til þess að líta, að í ár nemur hagræðingin af þeirri aðgerð rúmum 26 milljónum króna. Það er alltaf nóg til þegar stækka á yfirbyggingu borgarinnar – en þegar kemur að því að skera niður er almennt fyrst ráðist að þjónustu við íbúana,“ segir Hildur í færslunni.

Varpar hún í kaldhæðni fram þeirri hugmynd að hætta við hækkun starfsmannakostnaðar á skrifstofu borgarstjóra og tryggja frekar óskerta þjónustu sundlauganna.