Ríkissjónvarpið birtir þessa dagana viðtöl við forsetaframbjóðendur í Forystusætinu. Orðið á götunni er að þættirnir séu nokkuð misjafnir að gæðum, og þá ekki aðeins frammistaða frambjóðendanna heldur einnig frammistaða spyrla. Þannig vakti athygli í síðustu viku er einn reyndasti fréttamaður stofnunarinnar, sem einatt er fágaður og kurteis í framkomu, var sem andsetinn, gat vart falið lítilsvirðingu sína á frambjóðandanum, sem talinn er helst geta veitt fyrrverandi forsætisráðherra keppni um forsetaembættið, og leyfði honum sjaldan að ljúka máli sínu. Þótti frambjóðandinn taka ákefð spyrilsins af stakri stillingu.

Í þessari viku ræddi annar reyndur fréttamaður, Sigríður Hagalín Björnsdóttir, við fyrrverandi forsætisráðherra og þótti komast vel frá því. Orðið á götunni er að eitthvað virðist Ríkissjónvarpið hafa lært á þeirri viku sem leið milli þessara viðtala. Spyrillinn var ákveðinn og sýndi eftirfylgni en gætti þess þó að sýna viðmælanda sínum virðingu og gefa honum færi á að ljúka svörum sínum.

Orðið á götunni er að einna helst megi gagnrýna Sigríði Hagalín fyrir spurningarnar sem hún sleppti því að beina til viðmælanda síns. Í umræðuþætti á Ríkissjónvarpinu í upphafi kosningabaráttunnar voru frambjóðendur spurðir um fyrirhugaðan kostnað og sagði þá fyrrverandi forsætisráðherra að kostnaður framboðsins myndi hlaupa á einhverjum milljónum. Á daginn hefur komið að fyrrverandi forsætisráðherra rekur dýrustu kosningabaráttuna og ljóst að kostnaður sé þegar kominn í nokkra tugi milljóna. Talað er um að sægreifar kosti framboðið. Orðið á götunni er að Sigríður Hagalín hefði vel mátt inna Katrínu Jakobsdóttur eftir því hvort hún vilji tjá sig nú um kostnaðinn við framboðið og fjármögnun þess.

Þá hefur verið rifjað upp að fyrrverandi forsætisráðherra er í hópi þeirra sem lögðu kapp á að draga Geir Haarde fyrir Landsdóm og koma honum í fangelsi. Orðið á götunni er að margir gamlir sjálfstæðismenn sakni þess að Sigríður Hagalín skyldi ekki nota tækifærið og spyrja Katrínu Jakobsdóttur hvort hún iðrist síns þáttar í að reyna að koma Geir Haarde í fangelsi.

Að þessu slepptu er orðið á götunni að Sigríður Hagalín hafi komist vel frá viðtali sínu við fyrrverandi forsætisráðherra.