Rekstrarniðurstaða samstæðu A- og B-hluta Kópavogsbæjar var neikvæð um 800 milljónir samkvæmt ársreikning sveitarfélagsins sem var lagður fyrir bæjarráð í dag. Þrátt fyrir hallann segir bæjarstjóri að fjármál sveitarfélagsins séu að þokast í rétta átt og sé því um jákvæða niðurstöðu að ræða.

„Rekstur Kópavogsbæjar styrkist umtalsvert milli ára sem endurspeglar áherslu okkar á traustan rekstur. Þannig er afgangur af rekstri bæjarins fyrir fjármagnsliði 1,4 milljörðum hærri en í fyrra, þrátt fyrir að lífeyrisskuldbinding hækki um 1,3 milljarð milli ára,“ segir Ásdís í tilkynningu frá Kópavogsbæ. Veltufé frá rekstri eru fimm milljarðar sem er að sögn Ásdísar mikið styrkleikamerki en hér sé um tæplega tveggja milljarða aukningu að ræða milli ára sem þýði aukið svigrúm til að standa undir framkvæmdum og afborgunum lána. Skuldastaða bæjarins sé heilbrigð þrátt fyrir miklar fjárfestingar í leik- og grunnskólum sem og öðrum mikilvægum innviðum sveitarfélagsins.

„Skuldahlutfall Kópavogsbæjar fer áfram lækkandi og er langt undir lögbundnu skuldaviðmiði. Krefjandi rekstrarumhverfi, mikil verðbólga og háir vextir lita enn heildarniðurstöðu ársins og leiða til þess að fjármagnskostnaður er verulega umfram áætlun. Verkefnið nú sem endranær er að standa vörð um góðan rekstur þannig að áfram sé unnt að veita góða þjónustu en á sama tíma lækka skatta á bæjarbúa“

Nær engar lóðaúthlutanir voru árið 2023 sem hafði áhrif á tekjuöflun. Nú standi þó til að úthluta lóðum í Vatnsendahvarfi, þær fyrstu eru á næstunni en stefnt er að að úthluta öllum fyrir árslok. Fjárfestingar voru 5,2 milljarðar og var þá viðamesta fjárfestingin nýbygging Kársnesskóla. Viðhaldsframkvæmdir fóru fram á byggingum á borð við Sundlaug Kópavogs, Kópavogsskóla og Kársnesskóla. Lóðir leik- og grunnskóla voru endurgerðar fyrir um 200 milljónir og fyrir sömu fjárhæð var fjárfest í skíðasvæðum. 600 milljónir fóru svo í gatnagerð.

Vaxtaberandi skuldir námu rúmlega 35 milljörðum en heildarskuldir lækka milli ára úr 54 í 58 milljarða. Eigið fé nam 38,3 milljörðum, þar af 18,4 milljarðar í A-hluta samstæðunnar. Laun og launatengd gjöld námu alls 25,8 milljörðum en launakostnaður er um helmingur af rekstrartekjum. Fjöldi á launaskrá var í lok árs 2023 3.090 en meðal stöðugildi voru 1.988. Íbúar bæjarins voru þann 1. desember 40.570 talsins og fjölgaði þar með um 777 á 12 mánuðum.