Fullur salur var í Arion banka á dögunum þegar konur sóttu hvatningu, innblástur á Sýnileikadegi FKA 2024 þar sem Iða Brá Benediktsdóttir, aðstoðarbankastjóri Arion banka, opnaði daginn. Fundarstýra dagsins var Ósk Heiða Sveinsdóttir, fyrrum formaður FKA Framtíðar og framkvæmdastjóri Viðskiptavina hjá Póstinum. Elín, Auður og Inga hjá Birta Media ræddu um mikilvægi þess að treysta innsæinu og vegferðinni og Þórdís Valsdóttir, forstöðumaður útvarps hjá SÝN, var með einlæga hvatningarræðu.
„Taktu skrefið/take the leap!” var yfirskriftin á Sýnileikadeginum í ár en hann var haldinn í Arion banka í streymi fyrir félagskonur FKA í fjórða sinn.
Tengslamyndun og kynning á starfi FKA fór fram í hléi og þar var boðið upp á léttar veitingar, lukkuhjól með glæsilegum vinningum og konur gátu fengið portrait mynd hjá Huldu Margréti Óladóttur ljósmyndara, tilvalið til að birta með greinaskrifum, umsókn eða bara fyrir prófílinn. Justine Vanhalst hjá Hringvarma var með erindið „What do YOU want? Go and get it!“ og félagskonan, fyrrum Þakkarviðurkenningarhafi FKA og fyrsta íslenska konan sem skipuð var sendiherra í íslensku utanríkisþjónustunni, Sigríður Ásdís Snævarr, lokaði vel heppnuðum degi. Umræður voru á sviðinu í lok dags áður en dagskrá var slitið
Sögulega ömurlegir tímar.
Þemað í ár náði vel til viðstaddra og hvert erindið á fætur öðru hvatti konur til þess að taka breytingum fagnandi, vera áræðnar og láta drauma sína rætast.
„Konur sækja innblástur til þess að vaxa bæði persónulega og faglega á deginum og einmitt vegna þess að það eru sögulega ömurlegir tímar þá er mikilvægt að næra sig, efla andann og halda áfram er kemur að ná jafnrétti, verða sjálfbær og móta framtíð sem felur í sig frið,“ segir Andrea Róbertsdóttir framkvæmdastjóri FKA.
Í sýnileikanefnd FKA 2024 eru þær Bergrún Lilja Sigurjónsdóttir, sviðsstjóri sviðs fólks, upplýsinga og þróunar, hjá Vinnueftirlitinu, Aníka Rós Pálsdóttir, viðskipta- og þjónusturáðgjafi, Anna Liebel, stjórnandi hlaðvarpsins Genius Leadership hjá Anna Liebel ehf., Kathryn Gunnarsson eigandi og stofnandi Geko, Steinunn Ragnarsdóttir, framkvæmdastjóri og listrænn stjórnandi og ráðgjafi, og Veronika Guls, markaðsstefnuráðgjafi.
Sýnileikadagurinn sló enn eitt þátttökumetið og þakkir færðar samstarfsaðilunum Arion banka, SÝN og Coca Cola á Íslandi sem er aðalstyrktaraðili Félags kvenna í atvinnulífinu, FKA sem fagnar 25 ára afmæli á starfsárinu.
Í tilkynningu frá FKA eru konur hvattar til að fjárfesta í sér, setja sig á dagskrá og taka þátt í félagsstarfi félagsins. Ljósmyndarinn Cat Gundry Beck tók myndir á deginum.
