Hatrammar fjölskylduerjur hafa lengi átt sér stað í Dalabyggð, en málið tengist inn í stjórnarráðið þar sem um er að ræða fjölskyldu Ásmundar Einars Daðasonar, mennta- og barnamálaráðherra. Ljósi er varpað á eina hlið þessa erfiða fjölskyldumáls í hlaðvarpi sem þrjár systur, sem tengjast Ásmundi ættarböndum, hafa farið af stað með. Hlaðvarpið kallast Lömbin þagna ekki og þar segjast systurnar svipta hulunni af 15 ára ættardeilum ráðherra sem meðal annars hafi falið í sér ofsóknir, skemmdarverk, innbrot og andlegt ofbeldi.
Systurnar greina frá því að deilurnar megi rekja um 15 ár aftur í tímann. Þegar afi þeirra lá banaleguna hafi faðir Ásmundar Einars, Daði Einarsson og Valdimar Einarsson bróðir hans, gengið hart fram gegn öldruðum manninum til að þvinga hann til að skrifa undir alls konar pappíra. Var það vilji Daða að komast framhjá erfðaskrá sem kvað á um að jörðin Lambeyri ætti að skiptast jafnt milli átta systkina. Meðal þess sem Daði fékk pabba sinn til að skrifa undir var tryggingarbréf, en á grundvelli þess náði Daði að veðsetja jörðina og búið upp í topp.
Systurnar segja að Daði hafi reynt allt sem í hans valdi stóð til að svipta systkini sín eignarhlutanum að jörðinni, en tapað í þrígang fyrir dómstólum í málum sem fóru alla leið fyrir Hæstarétt. Faðir Daða skildi einnig eftir sig bankareikning þar sem finna mátti nokkuð mikla innistæðu. Hafi Ásmundur Einar náð prókúru, án þess að hafa samþykki erfingjanna, utan föður síns, og á grundvelli þess réðst hann í óskynsamlegar fjárfestingar svo innistæðan helmingaðist. Tókst Daða svo að fá reikninginn alveg til sín og tæmdi hann alveg. Jörðin fór svo á uppboð vegna veðsetningar sem systkinin höfðu ekki veitt samþykki fyrir. Þar með var allur föðurarfur systkinanna horfinn, allt vegna Daða.
Skúli Einarsson, faðir systranna í hlaðvarpinu og bróðir Daða, ákvað að mæta á uppboðið og keypti hann, ásamt tveimur systrum sínum og mági, jörðina, enda var hún þeim hjartfólgin. Þar höfðu foreldrar þeirra haldið bú og móðurforeldrar þeirra þar á undan.
Daði Einarsson var þó ekki sáttur við þessi málalok. Taldi hann sig enn eiga tilkall til jarðarinnar og gekk um alla sveitina og tilkynnti það öllum sem heyra vildu að hann væri réttmætur eigandi.
Þá hófst ævintýralegt stríð hans við sinn eigin bróður sem ekki sér fyrir endann á, en kalla hefur þurft til lögreglu sökum bæði skemmdarverka og innbrota. Í tvígang hefur Ásmundur Einar, ráðherra, verið staðinn að verki – af lögreglu- að brjótast inn í mannvirki á lóðinni, að sögn systranna.
Systurnar segja að atburðarásin minni helst á myndina Hrútar og líklega sé tímaspursmál þar til einhver slasast í þessum hatrömmu deilum.
„Og það sem við fjölskyldan erum búin að þola eru stöðugar árásir, lygar, skemmdarverk upp á margar margar milljónir, andlegt álag, andlegt ofbeldi, svik og við erum bara komnar með nóg.“
Systurnar segja að málið hafi legið þungt á þeim og klofið fjölskylduna, en Daði og Ásmundur Einar hafi fengið frænda sinn, Böðvar Bjarka Pétursson stofnanda og eiganda Kvikmyndaskólans, til að ganga milli ættingja og sveitunga til að dreifa þeirri lygi að Daði eigi tilkall til jarðarinnar. Þrátt fyrir að jörðin hafi farið á uppboð sökum skulda Daða sjálfs. Systurnar segja Daða stunda kennitöluflakk. Það sé hans leið í lífinu að veðsetja og sækja lán og gæta þess að þurfa aldrei að borga neitt til baka. Sá brandari mun ganga í sveitinni að kindur hans Daða fái hátt í fjórar kennitölur á þeirra stuttu ævi.
Þær segja að Ásmundur Einar sé ekki með sterkari siðferðiskennd en faðir hans. Hann hafi átt það til að stela öllu lauslegu af afa sínum á meðan hann lifði svo sá gamli þorði varla að kaupa sér vandaða hluti, því Ásmundur Einar kæmi þá bara og tæki þá af honum.
Þær systur segjast stíga fram með hlaðvarp sitt þar sem fjölskylda þeirra neiti að heyra þeirra hlið. Þau lýsi yfir hlutleysi en hafi samt tekið Daða og hans málflutning trúanlegan. Mannorð þeirra hafi verið svert með rætnum lygum, svikum og allskonar ógeðfelldri framkomu en Daði hafi stundað gífurleg skemmdarverk og hlaupi tjónið á milljónum. Hann hafi mætt með gröfu og sturtað skít við mannvirki á jörðinni, hann hafi skilið eftir rotnandi hræ af kindum og þannig mætti áfram telja.
Meðal þess sem Daði gerði fyrir þann pening sem hann tók að láni með veði í jörðinni, áður en hann missti hlut sinn og systkina sinna í henni á uppboði, hafi verið að reisa hús fyrir Ásmund Einar á jörðinni. Þeim feðgum þyki verulega súrt að þurfa að sjá á eftir húsinu. Eðlilega hefði maður haldið að deilurnar mætti rekja til þess að systkini Daða séu reið sökum þess að hann svipti þau föðurarfinum, en sú er ekki raunin. Deilurnar má rekja til þess að Daði er reiður út í bróður sinn og systur fyrir að hafa keypt jörðina.
„Hann er brjálaður. Hann er snarbrjálaður því honum finnst hann eiga að eiga allt landið og hann segir öllum að hann eigi landið og þau séu að stela því af honum.“
Systurnar segjast óhræddar að segja sína sögu, enda sé sannleikurinn þeirra megin. Þau og faðir þeirra hafi alltaf sagt sömu söguna á meðan Daði og Ásmundur Einar breyti sinni eftir vindátt.
„Og þá er Daði brjálaður. Svo ógeðslega andstyggilega brjálaður og Ásmundur Einar náttúrulega líka, alveg snar, því þeir vilja eiga allt án þess að borga fyrir það. Þeir vilja bara fá endalaus lán, aldrei borga neitt til baka. Þeir vilja fá endalausa styrki hvort sem þeir eiga það skilið eða ekki. Þeir vilja bara taka taka taka taka og aldrei gefa neitt í staðinn.“
Segja þær að í tvígang hafi Ásmundur Einar verið staðinn að innbroti á jörðinni. Annars vegar í húsið sem var reist fyrir hann, og í hitt skiptið í hlöðu. Í báðum tilvikum hafði hann liðsauka með sér og þegar lögregla mætti á svæðið var málið afskrifað sem deilur um eignarhald, þrátt fyrir að eignarréttur Skúla og systra hans sé ótvíræður. Í fyrra tilvikinu hafði Ásmundur Einar klippt á lás og hafði með sér minnst tvo stóra bíla og 2-3 menn. Daði mun líka hafa verið á vettvangi en forðað sér til fjalla þegar lögreglu bar að garði.
Systurnar furða sig á viðbrögðum lögreglu og velta því fyrir sér hvort fólk geti almennt brotist inn til systkina sinna og afsakað sig með því að halda fram eignarétti yfir því sem það eigi ekkert tilkall til. Nú sé staðan svo að faðir systranna hefur komið fyrir eftirlitsmyndavélum og gert öllum það skylt sem á jörðinni dvelja að læsa þurfi bæði gluggum og hurðum áður en íbúðarhúsin eru skilin eftir mannlaus.
Í seinna innbrotinu hafi Ásmundur Einar tekið yngri bróður sinn með sér, sem þá var ekki orðinn tvítugur og hefur engin tengsl við þessar deilur.
Verst þykir systrunum að frændi þeirra Böðvar Bjarki Pétursson, kvikmyndaleikstjóri, hafi stungið föður þeirra í bakið. Skúli faðir þeirra hafi elskað frænda sinn og haldið mikið upp á hann. Þegar Böðvar Bjarki átti á hættu að missa húsið undan sér og fjölskyldu sinni hafi Skúli bjargað honum og þegar Böðvar Bjarki þurfti peninga til að geta látið Kvikmyndaskólann verða að raunveruleika þá hafi Skúli líka verið boðinn og búinn til að aðstoða. Það hafi því verið mikið áfall að mæta á fund vegna fjölskyldudeilnanna og sjá Böðvar Bjarka þar mættan sem talsmann Daða.
„Og pabbi fær bara sjokk. Í alvöru talað. Ein verstu svik sem hann hefur upplifað á ævinni.“
Faðir þeirra hafði aldrei beðið frænda sinn um að taka afstöðu í deilunum milli bræðranna, og jafnvel ekki farið fram á hlutleysi. Bara það eitt hefði verið nóg hefði Böðvar Bjarki varað Skúla við fyrir fundinn. Systurnar segja að þetta hafi verið mikið áfall, en þau viti í dag hvaða mann Böðvar Bjarki hefur að geyma. Þær taka eins fram að Ásmundur Einar hafi verið þingmaður á þessum tíma og velta því upp hvort Böðvar hafi séð hag sínum og Kvikmyndaskólanum betur borgið með því að standa með þingmanni í deilunum.
Bæði Ásmundur Einar og Böðvar Bjarki séu sjarmerandi menn og eigi auðvelt með að sannfæra fólk. Líklega hafi það hjálpað þeim þegar þeir gengu um sveitina og dreifðu „bulllygum“ um málið. Systurnar segir stöðuna núna þannig að enginn vilji hlusta á þeirra hlið.
Ástandið minni helst á ofbeldissamband og framkoma Ásmundar Einars og Daða á gaslýsingu. Þeirra helsta ósk er að ofsóknunum linni en þær segjast þó vita að sættir munu aldrei nást í stórfjölskyldunni sem þar til fyrir 15 árum var mjög náin.
Systurnar ætla að halda áfram að greina frá deilunum í næstu þáttum og munu þá rekja þau skemmdarverk sem unnin hafa verið sem og innbrot og framgöngu föðurbróður þeirra, Valdimars, sem sé vægast sagt búinn að vekja óhug með framkomu sinni.
