Þrír starfsmenn stafrænu auglýsingastofunnar SAHARA hafa nú gengið til liðs við stjórnendateymi og eigendahóp fyrirtækisins sem „partners“. Þetta eru þau Eva Þorsteinsdóttir viðskiptastjóri, Ágúst Örn Ágústsson framleiðslustjóri og Jón Gísli Ström, stafrænn markaðsstjóri.
Sigurður Svansson framkvæmdastjóri SAHARA er ánægður með að fá þau til liðs við eigendahópinn. „Þau hafa öll gegnt lykilhlutverkum og búa yfir mikilli reynslu og þekkingu sem er afar mikilvæg fyrir fyrirtækið. Nú fá þau tækifæri til að vera virkir þátttakendur í uppbyggingu fyrirtækisins og koma að stefnumótun þess til framtíðar. Mannauður er það mikilvægasta sem við eigum og forsenda velgengni; því er dýrmætt að geta dregið fleiri að borðinu með ferskar hugmyndir og ný sjónarhorn til að vinna með eigendum að lykilverkefnum félagsins. Það er líka sérlega ánægjulegt fyrir okkur að kynna til leiks nýja partnera á þessum degi, því 1. júní markar nýjan kafla í sögu SAHARA. Við höfum uppfært ásýnd og áherslur fyrirtækisins, m.a. með nýju merki og litavali,“ segir Sigurður.
Eva Þorsteinsdóttir er menntuð í viðskipta- og markaðsfræði og kom til starfa hjá SAHARA fyrir tæpum sjö árum sem framleiðandi. Hún gegndi síðar starfi framleiðslustjóra en hefur nú í nokkur ár verið viðskiptastjóri í viðamiklum innlendum og erlendum verkefnum. Eva segir það búið að vera frábært að vera hluti af SAHARA og upplifa vöxt fyrirtækisins á undanförnum árum. „Ég er mjög spennt fyrir komandi tímum með öllu þessu frábæra samstarfsfólki sem hvert og eitt býr yfir ótrúlegri þekkingu og afburða fagmennsku.“
Ágúst Örn lærði handritagerð og leikstjórn við Kvikmyndaskóla Íslands og hefur starfað hjá fyrirtækinu í rúm sex ár. Hann hóf sinn feril hjá SAHARA sem tökumaður og klippari en tók við stöðu framleiðslustjóra fyrir rúmum tveimur árum. „Ég er bæði stoltur og glaður á þessum tímamótum og ég hlakka mikið til að fá að taka þátt í áframhaldandi vexti SAHARA á komandi misserum,“ segir Ágúst Örn.
Jón Gísli Ström nam viðskiptafræði við Háskóla Íslands og stundaði síðan framhaldsnám í Bandaríkjunum samhliða því að spila fótbolta, en hér á landi lék hann bæði með ÍR og Fjölni. Hann starfaði sem markaðsstjóri hjá Ormsson áður en hann réðst til SAHARA fyrir þremur árum síðan. Jón Gísli kveðst fullur tilhlökkunar enda fjölmörg spennandi verkefni fram undan hjá Sahara á næstu misserum. „Við erum að innleiða nýjar stefnur og strauma til að gera fyrirtækið enn betur í stakk búið til að takast á við allar þær áskoranir sem fylgja sífellt örari þróun í hinum stafræna heimi.“
SAHARA sérhæfir sig í stafrænni markaðssetningu og framleiðslu. Hjá fyrirtækinu starfa nú rúmlega 30 manns, bæði hér á landi og á skrifstofu þess í Orlando í Bandaríkjunum.
