Maðurinn hefur frá öndverðu sóst eftir eilífri æsku. Í norrænni goðafræði gætti Iðunn forláta epla sem héldu guðunum síungum. Vergjarnar gyðjur lofuðu Ódysseifi ódauðleika ef hann vildi þýðast þær. Hinn vitri Ódysseifur lét þó ekki freistast heldur kaus að eldast og deyja á eðlilegan hátt í faðmi konu sinnar.
Forseti Bandaríkjanna og helsti keppinautur hans eru komnir fast að áttræðu.
Rolling Stones gáfu út nýja plötu á árinu. Þeir hafa engu gleymt og ekkert lært. Þeir eru allir fæddir fyrir 1950 og tekst að halda sér í sviðsljósinu þrátt fyrir framboð af yngri flytjendum.
Fjölmiðlar velta sér endalaust upp úr andlegri og líkamlegri heilsu þessara manna með óttablandinni virðingu. Hefur þeim tekist að finna galdraformúlu sem heldur þeim síungum?
Þegar grannt er skoðað sést að þessir gömlu menn nema Mick Jagger eru hrumir. Bandaríkjaforseti er valtur á fótum enda segir máltækið, „stirð eru gömlum stöðubeinin.“ Annar málsháttur segir „enginn er allt í senn ungur og gamall.“ Hinir öldnu hafa vaxið frá sjálfum sér og sjá æsku sína í rósrauðum bjarma en aldurinn setur eðlilega mark sitt á líkamlegt og andlegt atgervi. Smám saman mun Jagger fatast dansinn eins og öðrum. Aðferðir nútíma lýtalækna geta falið eðlilega öldrun en Elli kerling hefur þó alltaf betur. „Bágt er að tefja fyrir ellinni,“ segir enn eitt máltækið. Margt er reynt til að dylja aðsókn aldursins. Hann sígur yfir menn engu að síður og enginn fær breytt tímans rás.
Eilíf æska felst í því að halda í gleðina eða eins og Breiðfjörð segir:
Að lifa kátur líst mér máti bestur,
þó að bjáti eitthvað á
að því hlátur gera má.
„Gamall lifir meðan Guð vill,“ sagði amma mín heitin forðum.
Gleðilegt ár.
