„Nei, kannski ekki, en hann verður þá að svara því,“ segir Þórunn Sveinbjarnardóttir, þingmaður Samfylkingarinnar og fyrrverandi umhverfisráðherra, í Morgunblaðinu í dag þegar hún er spurð að því hvort ekki ríki einhugur í þingflokki Samfylkingarinnar um stefnu í orkumálum.

Jóhann Páll Jóhannsson, þingmaður flokksins, lýsti því í samtali við Morgunblaðið fyrr í vikunni að Samfylkingin styðji aukna orkuöflun. Ekki standi á flokknum í orkumálum.

Þórunn gagnrýnir orð samflokksmanns síns og segir ummæli hans vera „frjálslega túlkun á stefnu Samfylkingarinnar.

„Hann fer fram og lýsir sínum skoðunum. Ég byggi mína afstöðu á stefnu Samfylkingarinnar,“ segir hún við Morgunblaðið og bætir við að hún telji að einhugur ríki í þingflokknum um stefnu flokksins í orkumálum sem hún segir skýra. Leikreglur málaflokksins séu settar í rammaáætlun.

„Tafirnar sem reglulega er býsnast yfir eru á ábyrgð þeirra flokka sem nú virðast hafa mestar áhyggjur af orkuöflun í landinu,“ segir Þórunn og vísar til Sjálfstæðisflokks og Framsóknarflokks.