Í gær voru liðin 100 ár frá fæðingu Alberts Guðmundssonar, frægasta knattspyrnumanns Íslandssögunnar. Albert setti einnig sterkan svip á stjórnmál hér á landi á síðustu öld. Hann átti sæti í borgarstjórn og borgarráði, var kjörinn á Alþingi og gegndi stöðu fjármálaráðherra og síðar iðnaðarráðherra árin 1983 til 1987 fyrir Sjálfstæðisflokkinn. Vorið 1987 skildu leiðir hans og Sjálfstæðisflokksins en þá stofnaði Albert Borgaraflokkinn með skömmum fyrirvara og bauð fram í öllum kjördæmum í þingkosningunum þá um vorið, hlaut 12 prósenta fylgi og kom sjö mönnum á þing. Síðar varð Albert sendiherra Íslands í París.

Fjölskylda Alberts og Valsmenn komu saman til kaffisamsætis í húsakynnum Vals í gær. Ingi Björn sonur Alberts bauð gesti velkomna og þakkaði þeim fyrir að minnast þessara tímamóta en auk fjölskyldunnar var þarna saman kominn fjöldi Valsmanna, formaður félagsins, nokkrir fyrrverandi formenn og aðrir gamlir og góðir félagar og forystumenn sem nutu þessarar stundar vel. Eysteinn Hauksson tók til máls og rifjaði upp knattspyrnusögu Alberts og Þorgrímur Þráinsson talaði einnig. Þá tók Helena Albertsdóttir til máls en hún hefur verið búsett erlendis í 35 ár.

Um það er varla deilt að Albert Guðmundsson er mesti afreksíþróttamaður Vals frá upphafi og einnig Íslands en hann var fyrsti atvinnuknattspyrnumaður Íslands og lék knattspyrnu í Skotlandi, Englandi á Ítalíu og í Frakklandi um árabil.

Albert Guðmundsson lést 7. Apríl 1994.