Áslaug Arna Sigurbjörnsdóttir háskóla, iðnaðar- og nýsköpunarráðherra birti fyrir stuttu færslu á Facebook-síðu sinni en þar fjallar hún um ávarp sitt á Sjávarútvegsdeginum fyrr í vikunni. Ávarpið vakti mikla athygli ekki síst fyrir þær sakir að í upphafi ávarpsins hæddist hún að öðrum ráðherra í ríkisstjórninni, Svandísi Svavarsdóttur matvælaráðherra. Fyrir þessi orð hefur Áslaug Arna hlotið talsverða gagnrýni. Í færslunni dregur Áslaug Arna þó ekki í land að öðru leyti en því að henni þykir leitt að hafa birt mynd, sem raunar var samsett, af Svandísi á skjá á meðan hún lét þessi orð falla.

Sjá einnig: Áslaug skaut föstum skotum á Svandísi – „Ég gæti líka rætt samnefnarann yfir þetta flest, Svandísi Svavarsdóttur

Í upphafi færslunnar gerir Áslaug Arna aðalumfjöllunarefni ræðu sinnar að umtalsefni:

„Þema dagsins var um sjávarútveg og nýsköpun. Inntak ræðunnar var mikilvægi menntakerfisins fyrir nýsköpun, samfélagið og samkeppnishæfni þjóðarinnar. Benti á sláandi tölur úr nýjum skýrslum, bæði um stöðu drengja en líka um hve fáa við menntum úr verkfræði, tækni- og raunvísindagreinum sem skiptir lykilmáli þegar kemur að getu okkar að takast á við tækniumbreytingar og standast samkeppni þjóða.“

Hún fjallar því næst í færslunni um þau föstu skot sem hún beindi að Svandísi og myndina sem varpað var á skjá á meðan:

„Ég byrjaði þó ræðuna á segja sögu af sjálfri mér og vandræðalegum hrakförum mínum þegar ég fór á sjó. Svo sagði ég að það væri freistandi að ræða málefni líðandi stundar, eins og nokkur málefni sem heyra undir matvælaráðherra. Í þeirri umræðu birti ég mynd af matvælaráðherra sem ég hefði betur sleppt og mér þykir það leitt. Það setti orð mín í annað samhengi en ætlunin var.“

Áslaug Arna segir sig og Svandísi greina á sem séu ekki mikil tíðindi:

„Það ætti ekki að koma neinum á óvart að okkur matvælaráðherra greinir á um ýmislegt líkt og eðlilegt er hjá tveimur stjórnmálamönnum sem koma úr ólíkum flokkum. Í því eru engar fréttir.“