Félagskonur FKA Framtíðar fylltu salinn í Blush þegar boðið var á Trúnó við varðeldinn með nokkrum ungum og öflugum konum úr atvinnulífinu. Trúnó við varðeldinn er árlegur viðburður hjá FKA Framtíð þar sem rætt er við vel valdar fyrirmyndir á einlægum nótum.
Það var einstaklega kósí stemning þetta árið, en viðburðurinn fór fram í fallegri verslun Blush við Dalveg í Kópavogi. Að þessu sinni voru það Gerður Arinbjarnar eigandi Blush, Lína Birgitta eigandi Define the Line og Unnur Aldís markaðsstjóri Smitten sem sátu fyrir svörum við varðeldinn. Þar fóru þær yfir áskoranir á ferlinum, framtíðar áform sín og hvað þær gera til þess að efla sig í lífi og starfi. Ekki nóg með að félagskonur FKA Framtíðar hafi lært af þessum flottu konum þá voru þær einnig að læra af hvor annarri.
Auk trúnósins var boðið upp á veitingar, fordrykk frá Mekka og góðgæti frá Sætum Syndum. Lukkuhjólið vakti mikla lukku þar sem félagskonur gátu unnið flott verðlaun frá fyrirtækjum sem styrkja félagsstarf FKA Framtíðar eins og Blush, Te & kaffi, Angan skincare, GeoSilica, Salt, S4S, Öskur, Mantra og Stúdíó R57.
Á þessu starfsári er áhersla lögð á að styrkja konur á öllum sviðum, og þema vetrarins er „Sterkari þú“. Allir viðburðir starfsársins munu vinna með þemað, en stefnt er að fjölda fyrirlesara, námskeiða og fleiru skemmtilegu tengdu efninu.
Hér að neðan eru stórskemmtilegar myndir af viðburðinum.
