Arnar Þór Jónsson, varaþingmaður Sjálfstæðisflokksins, segist vera tilbúinn að beita sér fyrir því að útrýma Sjálfstæðisflokknum breyti flokkurinn ekki um stefnu í málefnum Íslands gagnvart Evrópusambandinu. Hann segir flokkinn þurfa að dusta rykið af þeim gildum sem hann stóð fyrir hér áður en í dag sé hann einfaldlega búinn að afvegaleiðast.

Þetta kemur fram í nýjum þætti hlaðvarpsins Ein Pæling. Þátturinn hefur einungis verið birtur áskrifendum en hluti þess verður birtur á sunnudag.

Arnar hefur áhyggjur af því að flokkurinn sé í tilvistarkreppu og hafi með hægum skrefum breyst í eitthvað annað en hann var:

„Sjálfstæðisflokkurinn á að standa undir nafni sem Sjálfstæðisflokkur. Það er að segja  stjórnmálahreyfing sem að ver hér það dýrmætasta, sem er frelsi okkar sem einstaklinga og sjálfstæði okkar sem þjóðar og sjálfsákvörðunarrétt okkar þannig að við séum þjóð á meðal þjóða.“

Hann heldur áfram: „Við eigum ekki að skattleggja fólk í drep eins og búið er að gera, við eigum ekki að þenja ríkið út eins og búið er að gera, við eigum að draga úr þessu eftirlitsbulli. Við eigum að ráða okkar eigin för. Við eigum ekki að afsaka okkur með því að segja að við séum skuldbundin af því að gera hitt og þetta.“

Hann hefur áhyggjur af því að íslenskir stjórnmálamenn séu einfaldlega strengjabrúður alþjóðlegra afla sem að séu ekki lýðræðislega kjörin og segir: „Þetta er skrifræðisbákn sem þenur sig út með hverjum deginum sem líður, íþyngir hér íslensku atvinnulífi, er farið að skattleggja okkur í þokkabót. Ég vil að Sjálfstæðisflokkurinn snarhætti allri þjónkun við þetta fyrirbæri og fari þess í stað að þjóna hér íslenskum almenningi. Þetta væri það sem hann á að gera. Ef hann gerir það ekki þá skal ég, leggja mitt af mörkum til þess að útrýma Sjálfstæðisflokknum ef þess þarf.“