Halldór Halldórsson, atvinnurekandi og fyrrverandi sveitarstjóri og borgarfulltrúi, greinir mótsagnir í stefnu og athöfnum stjórnvalda varðandi orkuskipti. Á sama tíma og ríkisstjórnin stefnir að því að útrýma olíunotkun sé nánast gert ókleift að virkja fyrir rafmagni. Þetta kemur fram í aðsendri grein Halldórs í Morgunblaðinu í dag.

Halldór dregur fram að ríkisstjórnin stefnir að útfösun jarðefnaeldsneytis árið 2040 en um þetta segir í stjórnarsáttmálanum:

„Lögð verður fram þings­álykt­un um orku­skipti og út­fös­un jarðefna­eldsneyt­is, þar sem sett­ar verða fram aðgerðir og grunn­ur lagður að því að full­um orku­skipt­um verði náð eigi síðar en 2040 og Ísland verði óháð jarðefna­eldsneyti fyrst þjóða.“

Halldór segir að ríkisstjórnin hljóti að stressast yfir tilhugsunin um að aðeins séu 17 ár í þessi orkuskipti, miðað við stöðu mála núna. Skrifræði valdi því að nær ómögulegt sé að virkja fyrir rafmagni:

„Það er auðvelt að ímynda sér að þegar ráðherr­ar og þing­menn rík­is­stjórn­ar­meiri­hlut­ans lesa þetta (sem þeim ber að gera reglu­lega) stress­ist þau veru­lega upp því það eru rétt 17 ár í að Ísland eigi að vera laust við ol­íu­notk­un. Ástæðan fyr­ir reglu­legu stresskasti er auðvitað sú að það er búið að byggja upp því­líkt skri­fræðis­kerfi á Íslandi varðandi orku­öfl­un að nán­ast von­laust er að virkja okk­ar um­hverf­i­s­vænu vatns­öfl en virkj­un þeirra er jú eina leiðin til að losna við alla þessa olíu eigi síðar en árið 2040, fyrst þjóða. Hin ástæðan er sú að hluti póli­tískt kjör­inna full­trúa kær­ir sig ekk­ert um að nýta end­ur­nýj­an­lega ís­lenska orku­gjafa og fer að fabúl­era um að hægt sé að gera þetta ein­hvern veg­inn öðru­vísi án þess að út­skýra það eða rök­styðja með sann­fær­andi hætti.“

Halldór segir þjóðina vera að glíma við þversagnir í þessum málaflokki. Á sama tíma og ríkisstjórnin lýsi yfir vilja til orkusipta og grænnar orkuframleiðslu sé hluti hennar á móti því að virkja. Tala þurfi skýrt um þessi mál:

„Við eig­um ótelj­andi kosti á að verja svæði sem við ætl­um ekki að nýta til orku­öfl­un­ar, það er nátt­úru­vernd og við Íslend­ing­ar erum góð í nátt­úru­vernd. En um leið er fjöldi svæða til­val­inn til orku­öfl­un­ar. Staðan er nefni­lega sú að við fram­leiðum 20 tera­vatt­stund­ir af raf­magni á ári hér á Íslandi en til að gera stefnu rík­is­stjórn­ar­inn­ar að veru­leika þarf að fram­leiða 16 tera­vatt­stund­ir til viðbót­ar ár­lega til að ná full­um orku­skipt­um. Næst­um jafn­mikið og við fram­leiðum í dag. Og við höf­um 17 ár til þess.“