„Stærsta hagsmunamál bænda er stuðningur þeirra við aðild Íslands að ESB sem er með stærsta landbúnaðarstuðningskerfi í heiminum. Með aðild fengist tollfrjáls aðgangur íslenskra landbúnaðarvara að markaði 500 milljóna neytenda,“ skrifar Thomas Möller varaþingmaður Viðreisnar í aðsendri grein sem birtist á Eyjunni í dag.

Thomas vísar í að Jóhannes Nordal fjallar í ævisögu sinni um skaðsemi haftastefnu og verndartolla sem ríktu hér frá í heimskreppunni um 1930 allt til að Viðreisnarstjórnin innleiddi viðskiptafrelsi um 1960. „Frelsi borgaranna, samkeppni og frjáls viðskipti eru helstu stoðir velferðar og hagsældar að mati Jóhannesar. Mörg dæmi sanna þessa skoðun hans.“

Thomas rifjar upp að með inngöngu Íslands í EFTA var tollum af iðnaðarvörum aflétt og í framhaldinu blómstraði íslenskur iðnaður og einnig að íslenskur grænmetisiðnaður hefur blómstrað eftir að tollum af grænmeti var aflétt fyrir nokkrum árum.

„Alltaf þegar markaðslausnir og samkeppni kemst á eykst hagur heimila og fyrirtækja,“ skrifar Thomas.

Hann víkur að því að í Costco sé að finna um 35 tegundir innfluttra osta og 25 sortir af kjötáleggi. allar þessar vörur beri allt að 1.000 króna verndartoll á kíló og nánast engar þeirra eru framleiddar hér á landi.

„Landbúnaðarstefnan er ekki að vinna með hagsmuni neytenda í huga. Sérhagsmunir eru teknir fram yfir almannahagsmuni,“ skrifar Thomas.

Hann segir sjálfsagt að styðja við landbúnað hér á landi eins og gert sé í öðrum löndum, m.a. innan ESB. Þar séu viðskipti hins vegar tollfrjáls og engir framleiðslustyrkir eins og hér tíðkast. Hér á landi  styrki skattgreiðendur landbúnaðarframleiðslu um 15 milljarða á ári, auk þess sem tollvernd gegn innflutningi sé talin kosta neytendur um 17 milljarða á ári. Á þessu kerfi tapi allir, líka bændur. Þeir einu sem græði séu afurðastöðvarnar.

„Með aðild að ESB myndu íslenskir bændur fá ríflega jarðræktarstyrki frá ESB enda er hann skilgreindur sem heimskauta landbúnaður sem ESB styrkjakerfið tekur opnum örmum.“

Thomas hnykkir út með því að segja að Viðreisn vilji sjá fleiri frjálsa bændur.

Grein Thomasar Möller í heild má sjá hér.