Sigurjón Þórðarson, varaþingmaður Flokks Fólksins sakaði Sigurð Inga Jóhannesson, innviðaráðherra um hroka og valdníðslu í óundirbúnum fyrirspurnartíma á Alþingi fyrr í dag. Ástæðan er sú að Sigurjón var hunsaður sem aðalmaður í stjórn Byggðastofnunar. Sigurður Ingi var ráðvilltur þegar hann kom í tvígang í ræðustól til andsvara og sagðist einfaldlega ekki hafa hugmynd um hvað Sigurjón væri að tala.
Orðskipti Sigurjóns og Sigurðar Inga á Alþingi í dag
Sigurjón hefur setið sem varamaður í stjórn Byggðarstofnunar en á dögunum var skipað að nýju í stjórnina. Færði Sigurjón rök fyrir því í ræðustóli að hann hafi komið ýmsum þörfum málum í verk í stjórninni, meðal annars endurskoðun á úthlutun byggðarkvóta stofnunarinnar.
„Sem hefur meðal annars farið til útgerða sem komnar eru upp fyrir kvótaþakið og jafnvel til erlendra auðmanna og í fjölda tilvika hefur ekki verið landað afla í þeim byggðarlögum sem byggðarkvótinn hefur verið ætlaður,“ sagði Sigurjón.
Það hafi þó ekki verið þrautalaust en þingmaður fullyrti að hann hafi, ólíkt öðrum stjórnarmönnum, verið kallaður í sérstakt próf hjá Seðlabankanum því að vafi léki á hæfi hans til að sitja í stjórn stofnunarinnar. Eitthvað sem Sigurjóni fannst forkastanlegt í ljósi ferilskrár sinnar.
Á dögunum hafi Flokkur fólksins svo tilnefnt hann sem aðalmann í stjórn Byggðastofnunar. Sú ósk hafi hins vegar verið virt að vettugi af Sigurði Inga.
„Skýringar ráðherra voru að ég hafi verið gerður það [innsk. blm. sumsé varamaður] vegna reglna um kynjahlutföll í stjórn stofnunarinnar. Með öðrum orðum það er verið að misnota lög um jafna stöðu kynjanna,“ sagði Sigurjón og bætti við að þetta inngrip lyktaði óneitanlega af misnotkun og valdahroka.
„Það sem undirstrikar það er að aðrar skipanir ráðherra á karlmönnum eru verulega umdeildar og ég hef vakið athygli Fjármálaeftirlitsins á því. Og mér finnst það sárt að við skulum vera hér að ræða þessi mál og menn sýni svona valdhroka við skipan stjórnar opinberra stofnanna og sýni ekki meiri auðmýkt.“
Sigurður Ingi var til andsvars og virkaði hálf undrandi í ræðustól. „Ég verð að viðurkenna að ég áttaði mig ekki almennilega á fyrirspurn mannsins,“ sagði ráðherrann. Sagði hann ekki sjá betur en að farið hafi verið eftir lögum og það af „auðmýkt“. Sagði hann að allir nýir stjórnarmenn þyrftu að undirgangast hæfnispróf hjá Fjármálaeftirliti og að hann vissi ekki til þess að Sigurjón hefði verið dreginn í sérstakan dilk hvað það varðar.
Sigurjón mætti síðan aftur í ræðustól og skaut áfram föstum skotum. „Það er nú svo að þegar hæstvirtur ráðherra var inntur eftir því hvers vegna hann hefði nú ekki farið að tilnefningu flokksins þá var nú engin auðmýkt í svörunum. Það var nú einfaldlega: „Ég ræð og það er það sem stendur“,“ sagði Sigurjón.
Þá sagði hann að það hefði verið betri bragur á því ef að Sigurður Ingi hefði komið hreint fram varðandi það að hunsa tillöguna um hann sem aðalmann og að allt ferlið lyktaði af lítilsvirðingu.
„Er Flokkur fólksins einhver annars flokks stærð hjá hæstvirtum ráðherra?“ spurði Sigurjón.
Sigurður Ingi steig síðan aftur í pontu og sagðist einfaldlega vera ráðvilltur. „ Ég verð nú að viðurkenna að ég veit ekkert hvert háttvirtur þingmaður er að fara og væri æskilegt, og reyndar mjög gott, ef hann myndi bera upp erindi varðandi aðrar tilnefningar sem ég þekki ekki hvað hann er að vísa til,“ sagði Sigurður Ingi og ítrekað að hann fylgdi lögum í hvívetna.
